Estoniyanın “SAL Recruitment” şirkəti ilin sonuna kimi Azərbaycanda filialını açmaq istəyir (ÖZƏL)

Energetika və maşınqayırma sahələrində işəgötürmə üzrə ixtisaslaşmış Estoniyanın “SAL Recruitment” şirkəti ilin sonuna kimi Azərbaycanda filialını açmağı planlaşdırır. Şirkətin direktoru Evald Qirtsız verdiyi müsahibədə bu barədə məlumat verib. Qirtsız bildirib ki, şirkət hazırda azərbaycanlı tərəfdaşları ilə fəal danışıqlar aparır. Onlar bir il ərzində ölkədə daimi ofisin açılması imkanını nəzərdən keçirirlər.

Direktor qeyd edib ki, Estoniya şirkəti Azərbaycanla birgə fəaliyyət üçün möhkəm təməl rolunu oynayacaq yerli tərəfdaşlar tapmağı önəmsəyir. “Biz həmkarlarımızla ilk dəfə martda burada olmuşuq. İndi isə artıq konkret razılaşmalar barədə danışa bilərik,” deyə Qirtsız bildirib. Şirkətin məqsədi, ölkədə səmərəli əməkdaşlığa başlamaq üçün lazımi bazanı yaratmaqdır.

SAL Recruitment əsasən personal icarəsi sahəsində işləyir. Onlar xüsusilə qaz, neft və qazma üzrə mütəxəssislərin icarəyə verilməsində əməkdaşlıq etməkdə maraqlıdırlar. Şirkət Norveç və Niderlandla müntəzəm əməkdaşlıq edir, qazma qurğularında fəaliyyət göstərir və ixtisaslı kadrların cəlb edilməsi üçün bütün zəruri sənədlərin rəsmiləşdirilməsinə hazırdır. Direktor əlavə edib ki, Azərbaycan onlar üçün perspektivli istiqamətdir və burada genişlənmək istəyirlər.

Şirkət fərqli sahələr üçün mütəxəssislərlə təminat verir. Bura maşınqayırma və metal konstruksiyaların istehsalı (o cümlədən qaynaqçılar və montajçılar) daxildir. Həmçinin, sənaye üsullu boyama işləri, günəş panellərinin quraşdırılması, tikinti və infrastrukturun inkişafı sahələri də bu çərçivədədir. Əlavə olaraq, kənd təsərrüfatı, fermerlik, qonaqpərvərlik, təmizlik xidmətləri və balıqçılıq sənayesi üzrə müxtəlif mütəxəssislərin icarəsi də şirkətin xidmətlərindəndir.