DÇ-2026: Azərbaycan millisi seçmə mərhələdə bu gün İslandiya ilə üz-üzə gələcək

Futbol üzrə Azərbaycan milli komandası DÇ-2026 Dünya Çempionatının seçmə mərhələsi çərçivəsində növbəti oyununa bu gün çıxır. Baş məşqçi Ayxan Abbasovun rəhbərlik etdiyi kollektiv Bakıda İslandiya yığmasını qəbul edəcək.

Bu vacib qarşılaşma 8-ci km qəsəbə stadionunda keçiriləcək və yerli vaxtla saat 21:00-da başlayacaq. Görüşün idarə edilməsi monteneqrolu FIFA referisi Nikola Dabanoviçə həvalə edilib.

D qrupunun digər matçı da bu gün baş tutacaq. Həmin oyunda Fransa millisi Ukraynanı öz meydanında qəbul edəcək. Bu görüş Bakı vaxtı ilə saat 23:45-də start götürəcək.

Hazırda qrup cədvəlində dörd oyundan sonra Fransa 10 xalla liderdir. Ukraynanın 7, İslandiyanın 4 xalı var. Azərbaycan millisi isə toplaya bildiyi 1 xalla qrupun sonuncu pilləsində yerləşir.