BŞTİ: 128 nömrəli tam orta məktəbdə yanğın olmayıb

128 nömrəli tam orta məktəbdə yanğın hadisəsinin baş verməsi ilə bağlı yayılan məlumatlar həqiqəti əks etdirməyib. Bakı Şəhəri üzrə Təhsil İdarəsi (BŞTİ) bununla bağlı rəsmi məlumat yayıb.

Bu xəbərlər axşam saatlarında bir valideyn tərəfindən göndərilmiş fotoşəkillərdən sonra yayılmağa başlamışdı. Həmin fotoda guya məktəbin yandığı təsvir olunurdu. Məktəb rəhbərliyi binaya baxış keçirdikdən sonra məlumatın tamamilə yanlış olduğu aşkarlanıb. Yoxlama nəticəsində məlum oldu ki, sadəcə məktəbin həyətyanı ərazisindəki ağac qırıntıları yandırılırmış.

Baxış aparılana qədər Fövqəladə Hallar Nazirliyinin (112) qaynar xəttinə məlumat verildiyindən, aidiyyəti orqanlar məktəbə gəldi. Əraziyə gələn qruplar yanmaqda olan ağac qırıntılarını söndürdü. Hadisə nəticəsində binaya və digər infrastruktura heç bir ziyan dəyməyib. Beləliklə, yayılan yanğın xəbərinin əsassız olduğu təsdiqləndi.