AzMİU-nun rektoru Çinin “Shanghai Jiao Tong” Universitetində səfərdə olub (FOTO)

Azərbaycan Memarlıq və İnşaat Universitetinin (AzMİU) nümayəndə heyəti rektor, professor Gülçöhrə Məmmədovanın rəhbərliyi ilə Çinin nüfuzlu Shanghai Jiao Tong Universitetində (SJTU) səfərdə olub. Bu səfər çərçivəsində AzMİU rəhbərliyi SJTU təmsilçiləri ilə bir sıra görüşlər keçirib. Əsas görüşlərdən biri Universitetin Vitse-prezidenti LIU Weidong ilə baş tutdu. Bu danışıqlarda iki ali təhsil müəssisəsi arasında akademik əməkdaşlığın genişləndirilməsi, birgə tədris proqramlarının inkişafı və qarşılıqlı elmi layihələrin reallaşdırılması imkanları dərindən müzakirə edildi. Nümayəndə heyəti, həmçinin, digər fakültə və şöbə rəhbərləri ilə də görüşlər keçirib.

Görüşlər AzMİU və SJTU arasında mövcud olan akademik tərəfdaşlıq əlaqələrini gücləndirməyə yönəldi. Tərəflər tədris proqramlarının qarşılıqlı inkişafı, elmi-tədqiqat sahələrində təcrübə mübadiləsi və tələbə mübadiləsi imkanlarını nəzərdən keçirdilər. Bundan başqa, AzMİU nümayəndə heyəti Çin təhsil sisteminin qabaqcıl təcrübələri, yeni tədris metodları və laboratoriya infrastrukturu barədə geniş məlumatlar aldı. Bu danışıqlar hər iki universitetin elm və təhsil sahələrində birgə fəaliyyətini dərinləşdirmək məqsədi daşıyırdı.

Nümayəndə heyəti SJTU-nun Dizayn Məktəbində ayrıca görüş keçirdi. Burada dizayn sahəsində qabaqcıl tədris metodikası, gənc mütəxəssislərin praktiki hazırlığını təmin edən kurs layihələrinin ardıcıl həyata keçirilməsi və digər vacib məsələlər ətrafında fikir mübadiləsi aparıldı. Hər iki universitetin Dizayn fakültələri arasında tələbə mübadiləsi və ikili diplom proqramı ilə bağlı ilkin müzakirələr aparıldı. Səfərin sonunda AzMİU nümayəndə heyəti SJTU-nun dəvəti ilə Çində keçirilən “Mathematics and AI” beynəlxalq elmi konfransında iştirak etdi.