Azərbaycanın qadın güləşçisi dünya üçüncüsü olub

Serbiyanın Novi Sad şəhərində davam edən U-23 dünya çempionatında qadın güləşçilərimiz mübarizəni başa vurdu. Yarışın altıncı günündə yığmamız sevindirici nəticə əldə etdi. Məhz həmin gün 18 yaşını qeyd edən perspektivli idmançı Günay Qurbanova (59 kq) Azərbaycanı medalsız qoymadı. O, bu çempionatda bürünc medal qazanaraq adını fəxri kürsüyə yazdırdı.

Gənc güləşçi İtaliya təmsilçisi Aurora Russo ilə qarşılaşmada qətiyyətli idi. Qurbanova rəqibini üstələyərək ona "tuş"la qalib gəldi. Bu qələbə G. Qurbanovanı U-23 dünya çempionatının bürünc medalçısı etdi. Qadın güləşi üzrə mübarizənin yekunlaşması ilə millimiz bir medalla öyünə bilir.

Təəssüf ki, iki sərbəst güləşçimiz fəxri kürsüyə qalxma şansını itirdi. Maqomed-Başir Xaniyev (74 kq) medalın bir addımlığında dayandı. O, Almaniyalı Manuel Vaqinə 4:8 hesabı ilə məğlub oldu. Digər güləşçimiz Sadiq Mustafazadə (92 kq) isə təsəlliverici görüşdə Özbəkistandan olan Şirzad Poyonova "tuş"la yenildi. Bu nəticələr güləşçilərimizin yarışın bu mərhələsində medalsız qalmasına səbəb oldu.