ADY və Dövlət Əmək Müfəttişliyi Xidməti birgə təlimlərə başlayıb

"Azərbaycan Dəmir Yolları" (ADY) Qapalı Səhmdar Cəmiyyətinin Əməyin təhlükəsizliyi və mülki müdafiə departamenti ilə Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti (DƏMX) arasında birgə təlimlərə start verilib. Bu təlimlər ADY-nin fərqli sahələrində işləyən əməkdaşları üçün nəzərdə tutulub. Təlimlərin əsas hədəfi əməyin mühafizəsi, sağlam və təhlükəsiz iş mühitinin yaradılmasıdır. Həmçinin, əməkdaşların bilik və bacarıqlarını gücləndirmək, istehsalatda baş verə biləcək bədbəxt hadisələrin qarşısının alınması və ümumi təhlükəsizlik mədəniyyətinin yüksəldilməsi vacibdir.

Proqram nəzəri və praktiki hissələrdən təşkil edilib. Təlimin nəzəri hissəsini DƏMX-nin tabeliyində fəaliyyət göstərən Əməyin Mühafizəsi Mərkəzinin əməkdaşları keçirib. Onlar iştirakçılara əməyin mühafizəsi sahəsində qüvvədə olan qanunvericilik tələbləri barədə ətraflı məlumat veriblər. Layiqli əməyin, təhlükəsiz və sağlam şəraitin təmin edilməsi, istehsalat qəzalarının önlənməsi və əməyin mühafizəsi üzrə dövlət standartları da müzakirə olunub. Praktiki mərhələ ADY-nin Əməyin təhlükəsizliyi və mülki müdafiə departamentinin əməkdaşları tərəfindən həyata keçirilib. Bu hissədə yanğından mühafizə zamanı doğru davranış qaydaları əyani şəkildə nümayiş etdirilib.

Bu təlimdə ADY-dən 100-ə yaxın əməkdaş iştirak edib. Qeyd olunan birgə fəaliyyət gələcək mərhələlərdə də davam etdiriləcək. ADY və Əməyin Mühafizəsi Mərkəzinin əməkdaşları müəssisələrdə metodiki dəstəyi təmin edəcək, zəruri hallarda işçiləri birbaşa təlimatlandıracaqlar. Həmçinin, SƏTƏM (Sağlamlıq, Əməyin Təhlükəsizliyi və Ətraf Mühitin Mühafizəsi) ixtisas tələblərinə uyğun maarifləndirici tədbirlərin təşkili də planlaşdırılır.