ABŞ ilin sonunadək Azərbaycan və Ermənistanla ilk İşçi qrupları yaradacaq - EKSKLÜZİV

Amerika Birləşmiş Ştatları hökuməti bu ilin sonuna kimi Azərbaycan və Ermənistanla ilkin İşçi qruplarının yaradılmasını planlaşdırır. Bu məlumatı "Report"un ABŞ bürosuna Birləşmiş Ştatların Dövlət Departamentinin Mətbuat xidməti açıqlayıb. ABŞ hökuməti əldə edilmiş razılaşmalara uyğun olaraq Azərbaycan və Ermənistanla əməkdaşlığı davamlı şəkildə dərinləşdirməkdədir. Qurum bildirir ki, Vaşinqton hər iki hökumətlə ilkin İşçi qruplarının yaradılmasını bu ilin sonunadək reallaşdıracaq.

Dövlət Departamenti xüsusi olaraq 8 avqust tarixində Vaşinqtonda imzalanmış tarixi birgə Bəyannamə və Anlaşma Memorandumlarının icrasına sadiq qaldığını vurğulayıb. Bu sənədlərin icrası, İşçi Qruplarının formalaşdırılması üçün əsasdır. ABŞ hökuməti Azərbaycan və Ermənistan rəsmiləri arasında inkişaf etdirilən görüşləri və bu görüşlər nəticəsində əldə olunan razılaşmaların icrasını yaxından izləyir. Birləşmiş Ştatlar Azərbaycanla Ermənistan arasında davam edən dialoqu və son dövrdə atılan praktiki addımları **müsbət qiymətləndirir**.

Qurum, sərhədlərin müəyyənləşdirilməsi, mina təmizləmə əməliyyatları və TRIPP layihəsinə dəstək məqsədi ilə infrastrukturun inkişafı üzrə aparılan son məzmunlu müzakirələri alqışlayır. Həmçinin, Azərbaycanın Ermənistana göndərilən yüklərin tranzitinə icazə verməsi barədə qərarı və Ermənistanda Azərbaycan və Ermənistan **vətəndaş cəmiyyəti nümayəndələrinin** görüşü də yüksək dəyərləndirilib. ABŞ-nin rəhbərlik etdiyi təşəbbüslər bu səylərlə birlikdə özəl investisiyaları cəlb edəcək. Bu proses Azərbaycan, Ermənistan və onların hüdudlarından kənarda **yeni firavanlıq dövrü** başlada bilər.