Prezidentin əfv sərəncamı müxtəlif cəzaçəkmə müəssisələrində icra olunub
Prezident İlham Əliyevin imzaladığı əfv Sərəncamı Ədliyyə Nazirliyi Penitensiar Xidmətin bir sıra cəzaçəkmə müəssisələrində icra olunub. Lənkəran Cəzaçəkmə Müəssisəsində sərəncam 2 nəfərə şamil edilib. Onlardan biri Fransa Respublikasının vətəndaşıdır.
17 saylı Cəzaçəkmə Müəssisəsində əfv sərəncamı ümumilikdə 4 nəfərə şamil olunub. Qadın məhkumların cəza çəkdiyi 4 saylı Cəzaçəkmə Müəssisəsində isə sərəncam 1 nəfərə, Pakistan vətəndaşına şamil edilib və həmin şəxs azadlığa buraxılıb.
Azərbaycanda cəza çəkən 5 əcnəbi vətəndaş əfv olunub
Prezidentin imzaladığı Sərəncama əsasən, ölkədə cəza çəkən 5 əcnəbi vətəndaş əfv olunub. Bu qərar məhkum edilmiş bir sıra şəxslərin əfv olunması haqqında sənəddə öz əksini tapıb. Əfv olunan şəxslərdən biri Fransa vətəndaşıdır.
Rusiyada 12 il əvvəl törədilmiş qətl işi üzrə hökm oxunub
Bakı Ağır Cinayətlər Məhkəməsində Rusiyada 12 il əvvəl törədilmiş qətl işi üzrə yekun proses keçirilib. Hakim Eldar İsmayılovun sədrliyi ilə keçirilən iclasda Elxan Xuduyev və Seymur Məmişov barəsində hökm oxunub.
Naxçıvanda tanınmış atlet dələduzluqda təqsirli bilinərək həbs edilib
Naxçıvanda tanınmış atlet Əmrah Nağıyev dələduzluqda təqsirli bilinərək həbs edilib. O, polis əməkdaşları tərəfindən saxlanılıb. Məlumata görə, o, bir neçə şəxsə onların övladlarının müxtəlif idman normativlərindən uğurla keçməsinə köməklik göstərə biləcəyini vəd edib.
Bakıda 31 kq narkotik aşkarlanıb, Bərdədə qanunsuz silah saxlayan şəxs tutulub
Nərimanov Rayon Polis İdarəsinin əməkdaşları narkotik vasitələrin qanunsuz dövriyyəsinə qarşı əməliyyatlar keçirib. Daxili İşlər Nazirliyindən verilən məlumata görə, tədbir zamanı narkokuryerlik etməkdə şübhəli bilinən P.Mustafayev və Ə.İsmayılov saxlanılıb, ümumilikdə 31 kq narkotik aşkarlanıb.
Bərdə rayon sakini Y. Fətullazadə isə qanunsuz olaraq odlu silah və sursat əldə etmək, saxlamaq və satmaqda şübhəli bilinərək saxlanılıb. Bu barədə Daxili İşlər Nazirliyinin Mətbuat Xidməti məlumat yayıb.