Qanunsuz silah-sursat aşkarlanıb
Polis əməkdaşları mayın 8-də paytaxt və respublikanın müxtəlif rayonlarında geniş əməliyyat keçirərək qanunsuz silah-sursat aşkar ediblər. Əməliyyat zamanı 3 avtomat silahı, 2 tapança, 5 tüfəng və 4 patron darağı, həmçinin 219 ədəd müxtəlif çaplı patron dövriyyədən çıxarılıb.
Cəlilabadda yeniyetmələr arasında dava bıçaqlanma ilə nəticələnib
Cəlilabad rayonunun Uzuntəpə kəndində yeniyetmələr arasında yaranan mübahisə ciddi nəticələrə səbəb olub. Hadisə valideynlərin məsələyə aydınlıq gətirmək üçün görüşməsi zamanı baş verib. İlkin məlumatlara görə, yeniyetmələrin valideynləri arasında münaqişə kəskinləşərək bıçaqlanma ilə nəticələnib.
Suraxanıda 12 kq narkotik dövriyyədən çıxarılıb
Suraxanı Rayon Polis İdarəsinin 33-cü Polis Şöbəsi narkotik vasitələrin qanunsuz dövriyyəsinə qarşı uğurlu əməliyyat həyata keçirib. Əməliyyat zamanı 12 kiloqram 305 qram marixuana aşkarlanıb və əvvəllər məhkum olunmuş 43 yaşlı şəxs saxlanılıb.
Özünü vəkil kimi təqdim edən dələduz həbs edilib
Pirallahı Rayon Polis İdarəsinin əməkdaşları özünü vəkil kimi təqdim edib dələduzluq əməlləri törətməkdə ittiham edilən Fuad Əliyevi saxlayıblar. Araşdırma zamanı məlum olub ki, Əliyev zərərçəkəni işlə təmin edəcəyinə dair yalan vəd verərək ondan pul alıb.
Zaqatalada 39 yaşlı kişi güllələnib
Zaqatala rayon sakini İsa Bolayev gecə saat 02:00 radələrində Yuxarı Tala kəndi ərazisində yerləşən restorandan çıxarkən ov tüfəngindən açılan atəş nəticəsində xəsarət alıb. Yaralı Zaqatala Rayon Mərkəzi Xəstəxanasına yerləşdirilib. Hadisə ilə bağlı şübhəli şəxs saxlanılıb.
Tanışını qətlə yetirən şəxsə 18 il həbs cəzası verilib
Şəki Ağır Cinayətlər Məhkəməsi Xəyal Mənsimovun tanışını qətlə yetirməsi ilə bağlı cinayət işində hökmü elan edib. Hakim Xaliq Məmmədovun sədrliyi altında keçirilən prosesdə məhkəmə təqsirləndirilən şəxsə 18 il müddətinə azadlıqdan məhrumetmə cəzası təyin edib.