Saat 13:00 - Yazılı Xəbər İcmalı
Türkiyədə hava kəskin dəyişir: İstanbul daxil bütün ölkədə şiddətli yağışlar gözlənilir
Türkiyənin Meteorologiya Xidməti ölkə üzrə hava şəraitinin qəfil dəyişəcəyi barədə xəbərdarlıq edib. Uzun fasilədən sonra yenidən gözlənilən şiddətli yağışlar təkcə ayrı-ayrı bölgələri deyil, İstanbul daxil ölkənin geniş ərazisini əhatə edəcək. Meteorologiya dəqiq tarix açıqlayıb və vətəndaşları ehtiyatlı olmağa çağırıb.
Hindistanda etiraz aksiyası öncəsi "Tarakan" hərəkatının lideri saxlanılıb
Hindistanın paytaxtı Nyu-Dehlidə Seçki Komissiyası rəhbərinin istefasını tələb edən genişmiqyaslı etiraz aksiyası ərəfəsində "Cockroach" ("Tarakan") adlı gənclər hərəkatının lideri Abxicit Dipke Dehli hava limanında saxlanılıb. Hadisə hərəkatın əsas üzvlərinə qarşı səlahiyyətlilərin sərt tədbirlərinin başlanğıcı kimi qiymətləndirilir.
Çin Starlinkə rəqib peyk şəbəkəsini genişləndirir
Çin "Guovang" peyk şəbəkəsi çərçivəsində internet peyklərinin 27-ci qrupunu orbitə buraxıb. Çin Aviasiya Kosmos Elmi və Texnologiyası Korporasiyasının (CASC) məlumatına görə, peyklər "Long March" daşıyıcı raketi ilə kosmosa göndərilib. Layihə Çinin qlobal peyk interneti sahəsində ABŞ-ın Starlink sisteminə alternativ yaratmaq istiqamətində atdığı mühüm addımlardan biridir.
Prezident Əliyev Xəzərin dayazlaşması ilə bağlı xəbərdarlıq edib
Günün diqqətçəkən açıqlamalarından biri Prezident İlham Əliyevin Xəzər dənizinin dayazlaşması ilə bağlı xəbərdarlığı olub. Prezident bildirib ki, Xəzərin dayazlaşmasının hazırkı tendensiyası davam edərsə, nəticələr fəlakətli ola bilər. Bu bəyanat regionda ekoloji təhlükələrə diqqəti bir daha artırıb.