ABŞ İranla bağlı kritik qərar ərəfəsində: zərbə və ya razılaşma
ABŞ Prezidenti Donald Tramp Ağ Evdə jurnalistlərə açıqlamasında yaxın vaxtlarda İrana zərbələrin bərpa edilib-edilməyəcəyi və ya Tehranla razılaşma əldə olunacağı barədə qərar veriləcəyini bildirib. Tramp hər iki variantın mümkün olduğunu qeyd edərək deyib ki, qərar artıq gecikir. Eyni zamanda, ABŞ dövlət katibi Marko Rubio danışıqlar çıxılmaz vəziyyətə düşdükdən sonra İran nümayəndə heyətinin, o cümlədən xarici işlər naziri Abbas Əraqçinin ABŞ-dan çıxmasını tələb edib. Bu barədə "Axios" nəşri vəziyyətlə tanış olan mənbəyə istinadən xəbər verib. Bundan əlavə, Tramp Hörmüz boğazı üzərindəki ABŞ nəzarətinin dəyişə biləcəyini ehtimal edib. ABŞ Silahlı Qüvvələrinin Mərkəzi Komandanlığı (CENTCOM) isə açıqlayıb ki, iyulun ortalarında İranın dəniz blokadasının bərpa olunmasından bu yana 125 ticarət gəmisinin istiqaməti dəyişdirilib.
AEBA Zaporojye AES-də atəşkəs üçün danışıqlar aparır
Atom Enerjisi üzrə Beynəlxalq Agentliyin (AEBA) baş direktoru Rafael Qrossi "RİA Novosti"yə müsahibəsində bildirib ki, agentlik Rusiya və Ukrayna ilə Zaporojye Atom Elektrik Stansiyasında zədələnmiş elektrik xətlərinin təmiri üçün lokal atəşkəs barədə danışıqlar aparır.
Latviya nüvə silahı yerləşdirməyə hazır olduğunu açıqlayıb
Latviya Prezidenti Edqars Rinkeviçs zərurət yaranacağı təqdirdə ölkəsində nüvə silahı yerləşdirməyə hazır olduğunu bəyan edib. Dövlət başçısı jurnalistlərə verdiyi açıqlamada belə bir ehtiyac ortaya çıxarsa, Latviyanın buna hazır olacağını vurğulayıb.
Pentaqon texnologiya nəhəngləri ilə hərbi gələcəyi müzakirə edəcək
ABŞ-ın müdafiə naziri Pit Heqset müharibələrin gələcəkdə necə aparılacağını araşdırmaq məqsədilə "Meridian Layihəsi" adlı yeni təşəbbüsün startını verib. Layihəyə Elon Mask və Anduril şirkətinin təsisçisi Palmer Laki daxil edilib. Layihə texnologiyanın sürətlə inkişaf etdiyi dövrdə hərbi strategiyaların yenilənməsinə yönəlib.
Süni intellekt təhlükəsizlik maneələrini aşaraq biosilah təlimatları verib
Çinin "Moonshot AI" startapına aid iki süni intellekt modelinin daxili təhlükəsizlik maneələrini keçərək bioloji silahlar yaratmaq və sui-qəsdlər təşkil etmək üçün təlimatlar verə bildiyi aşkarlanıb. BBC-nin məlumatına görə, şirkət bu faktla bağlı daxili araşdırma başladıb.
İsveçrə buzlaqları son bir ildə kütləsinin 5 faizdən çoxunu itirib
İsveçrə buzlaqları qeyri-adi isti və quru yay, həmçinin az qarlı qış səbəbindən əvvəlki ilin kütləsinin 5 faizdən çoxunu itirib. Bu göstərici 2022-ci ilin rekord həddinə yaxındır. Ümumilikdə, ölkə buzlaqlarının həcmi son beş ildə təxminən 20 faiz azalıb.