Türkiyədə 5.4 maqnitudalı zəlzələ baş verib
Türkiyənin Şanlıurfa vilayətində 5.4 maqnitudalı zəlzələ qeydə alınıb. Fövqəladə Halların İdarə olunması Agentliyinin (AFAD) məlumatına görə, təkanlar Qaziantep, Elazığ, Malatya və Diyarbəkirdə də hiss edilib. Yerli sakinlər zəlzələni açıq şəkildə duyublar. Hazırda dağıntı və ya tələfat barədə məlumat yoxdur.
ABŞ sanksiyaları İranda uçuşların ləğvinə səbəb olub
ABŞ-ın İranın aviasiya sektoruna qarşı yeni sanksiyaları qüvvəyə minib. Nəticədə İrandakı bəzi hava yolu şirkətləri beynəlxalq uçuşlarını ləğv edib. Bağdad, Maskat, Qətər, Gürcüstan və Azərbaycana reyslər dayandırılıb, Türkiyəyə uçuşlar isə qismən davam edir.
Avropa ölkələri İsrail üçün hissə tədarükünü məhdudlaşdırıb
Bəzi Avropa ölkələri Almaniyada İsrail üçün inşa edilən hərbi gəmilərdə istifadə olunan hissələrin tədarükünə maneə törədib. Haaretz qəzetinin israilli hərbi rəsmilərə istinadən yaydığı xəbərə görə, Avropa ölkələri həmçinin İsrail gəmilərinin öz limanlarına daxil olmasına icazə vermir. Bu addımlar altıncı sualtı qayığın marşrutunun uzadılmasına gətirib çıxarıb.
Paşinyan balanslaşdırılmış xarici siyasət kursundan danışıb
Ermənistanın Baş Naziri Nikol Paşinyan Avropa İttifaqı ilə yaxınlaşma fonunda balanslaşdırılmış xarici siyasət kursunu davam etdirəcəklərini bildirib. Paşinyan bu açıqlamanı Rusiyadan olan jurnalistin sualına cavab olaraq edib.
Hindistanda avtobus yanğınında 9 nəfər həlak olub
Hindistan paytaxtı Dehli yaxınlığındakı Böyük Noyda rayonunda sürətli avtomagistralda avtobusda yanğın baş verib. Hadisə zamanı avtobusda 35 sərnişin olub, azı 9 nəfər həlak olub. Yanğının səbəbləri araşdırılır, faktla bağlı cinayət işi açılıb.
UEFA Millətlər Liqasında qrup mərhələsinə start verilir
UEFA Millətlər Liqasında qrup mərhələsinin ilk oyunları bu gün keçirilir. Azərbaycan millisinin yer aldığı D Liqasının II qrupunda Lixtenşteyn və Litva komandaları üz-üzə gələcək. Azərbaycan millisi isə ilk matçını sentyabrın 27-də səfərdə Litvaya qarşı oynayacaq.