İran Hürmüz Boğazının açılması üçün 7 şərt irəli sürüb
İranın Ali Milli Təhlükəsizlik Şurasının katibi Möhsün Rezai Hürmüz Boğazının yenidən açılması məsələsinə münasibət bildirib. O, televiziya çıxışında boğazın açılmazdan əvvəl İranın irəli sürdüyü 7 şərtin yerinə yetirilməli olduğunu vurğulayıb. Rezai eyni zamanda sərt açıqlama verərək, ABŞ Prezidenti Donald Trampın İrana qarşı yanlış addımlar atdığını artıq anladığını deyib. O iddia edib ki, nə Tramp, nə də İsrailin Baş naziri Benyamin Netanyahu bu vəziyyətdən sağ qurtula biləcək.
Kreml: Ukrayna ilə danışıqlar üçün zəmin yoxdur
Kremlin sözçüsü Dmitri Peskov Moskvada jurnalistlərə açıqlama verərək, Ukrayna böhranının həlli üçün danışıqlar prosesinə başlamağa zəminin olmadığını bildirib. Bununla belə, Peskov Rusiyanın sülh danışıqlarına açıq olduğunu vurğulayıb. O qeyd edib ki, Ukraynanın silahlandırılmağa davam etməsi prosesi çətinləşdirir. Bu açıqlama Aİ-nin daimi nümayəndələrinin Rusiyaya qarşı sanksiyaların 3 il uzadılması barədə razılığa gəldiyi bir vaxtda səslənib.
Türkiyənin müdafiə sənayesində 1,23 milyard avroluk müqavilə
Türkiyənin aparıcı müdafiə şirkətləri ASELSAN və ROKETSAN hava hücumundan müdafiə sisteminin alt komponentləri üzrə 1,23 milyard avro dəyərində müqavilə imzalayıb. Razılaşma hava hücumundan müdafiə sistemlərinin istehsalı üçün vacib alt hissələrin tədarükünü nəzərdə tutur və Türkiyənin müdafiə qabiliyyətinin gücləndirilməsinə yönəlib.
Elektrik enerjisi 2035-ci ilə qədər qlobal istehlakın üçdə birini ödəyə bilər
Beynəlxalq Enerji Agentliyi (BEA) hesabat yayımlayıb ki, elektrik enerjisi 2035-ci ilə qədər dünya üzrə son enerji istehlakının 33 faizini iqtisadi baxımdan səmərəli şəkildə təmin edə bilər. Hazırda bu göstərici 23 faiz təşkil edir. Hesabat Türkiyə və Avstraliyanın müraciəti əsasında COP31 çərçivəsində müzakirələr üçün hazırlanıb.
Özbəkistanda Azərbaycan dili kursları fəaliyyətə başlayacaq
Özbəkistanda Azərbaycan dili kursları yenidən fəaliyyətə başlayır. Azərbaycanın Özbəkistandakı səfiri Rəşad Məmmədov bu barədə sosial şəbəkə hesabından məlumat verib. Kurslar Azərbaycan səfirliyinin tabeliyində olan Heydər Əliyev adına Azərbaycan Mədəniyyət Mərkəzində təşkil olunacaq.
İngiltərənin cənubunda miqrantlara qarşı aksiyada 6 nəfər saxlanılıb
Hempşir polisi İngiltərənin cənubunda miqrantlara qarşı keçirilən aksiyada 6 nəfəri saxlayıb. Məlumata görə, yüzlərlə insan dənizdə bir sutkadan çox vaxt keçirmiş miqrantların olduğu qayığın şəhərə girişinə etiraz aksiyası keçirib.