BMT Baş Assambleyasında Qəzza gündəmi: Guterres soyqırımından danışıb, səkkiz ölkə İsrailə çağırış edib
Birləşmiş Millətlər Təşkilatının 81-ci Baş Assambleyasının yüksək səviyyəli ümumi müzakirələri başlayıb. BMT Baş katibi Antonio Guterres vidalaşma nitqində Qəzzadakı soyqırımından danışıb və ayaq üstə alqışlanıb. Dünya liderləri bir həftə davam edəcək çıxışlar və diplomatik təmaslar üçün Nyu-Yorkda toplaşıblar. Eyni zamanda, Türkiyə, BƏƏ, İndoneziya, Qətər, Misir, Pakistan, Səudiyyə Ərəbistanı və İordaniyanın xarici işlər nazirləri Baş Assambleya çərçivəsində görüşərək birgə bəyanat yayıblar. Nazirlər Qəzzada davam edən vəziyyətlə bağlı İsrailə qanunsuz tədbirləri ləğv etmə çağırışı ediblər.
Ermənistan xarici kəşfiyyatının rəhbəri Bakıdadır
Ermənistan Xarici Kəşfiyyat Xidmətinin rəhbəri Kristine Qriqoryan IV Bakı Təhlükəsizlik Forumunda iştirak edir. Bu barədə Ermənistan mediası Baş nazir Nikol Paşinyanın mətbuat katibi Melanya Arutyunyana istinadən məlumat yayıb. Qriqoryanın bu axşam Ermənistana geri dönəcəyi gözlənilir. Ermənistanın kəşfiyyat rəhbərinin Bakıya səfəri iki ölkə arasında davam edən normallaşma prosesi fonunda diqqət çəkir.
Tramp BMT çərçivəsində İran rəsmiləri ilə görüşmək istəyir
CNN-in məlumatına görə, ABŞ Prezidenti Donald Tramp müşavirlərinə Nyu-Yorkda keçirilən BMT Baş Assambleyası çərçivəsində "şərtlər uyğun olarsa" İran rəsmiləri ilə görüşmək istədiyini bildirib. Xatırladaq ki, İranın xarici işlər naziri Ərəqçi də BMT Baş Assambleyası üçün Nyu-Yorka gəlib və bu səfər müharibə kölgəsində kritik səfər kimi dəyərləndirilir.
Konqoda Ebola epidemiyası genişlənir
Konqo Demokratik Respublikasında davam edən Ebola epidemiyasında təsdiqlənmiş yoluxma sayı 7 672-yə, həyatını itirənlərin sayı isə 3 699-a yüksəlib. Ölkənin Səhiyyə Nazirliyinin məlumatlarına görə, epidemiya 7 əyalətin 63 bölgəsini əhatə edir.
Azərbaycan-Türkiyə hərbi əməkdaşlığı: Baş Qərargah rəisi türk nümayəndə heyəti ilə görüşüb
Azərbaycan Ordusunun Baş Qərargah rəisi general-polkovnik Kərim Vəliyev ölkəmizdə səfərdə olan Türkiyə Baş Qərargahının Beynəlxalq Müştərək Strateji Komandanlığının rəhbəri general-polkovnik Sebahattin Kılınc ilə görüşüb.
Azərbaycan yeddi ayda İtaliyaya 2,4 milyard dollarlıq qaz ixrac edib
Dövlət Statistika Komitəsinin hesabatına görə, 2026-cı ilin yanvar-iyul aylarında Azərbaycandan İtaliyaya 4,898 milyard kubmetr həcmində təbii qaz ixrac olunub. İxracın dəyəri 2,4 milyard dollara yaxın təşkil edib.