Saat 18:00 - Xəbər İcmalı
Bakı metrosunda yeni mərhələ - avtobus və taksi xidmətləri vahid idarəetmə altında birləşdirilir. "Bakı Metropoliteni" QSC-yə "BakuBus" və "Bakı Taksi Xidməti" MMC-lərinin qoşulması barədə qərar verilib. Bu addım şəhərdaxili ictimai nəqliyyatın idarəetməsini təkmilləşdirmək, xidmətlər arasında qarşılıqlı əlaqəni gücləndirmək və şəhər mobilliyini daha səmərəli təmin etmək məqsədi daşıyır.
ABŞ Dövlət katibi Marko Rubio Papa I Lev ilə Vatikanda görüşüb. Rubio sıx təhlükəsizlik tədbirləri altında yerli vaxtla 12:10-da Vatikana çatıb. Bu, tərəflər arasında yaşanan gərginliklərdən sonrakı ilk birbaşa təmas kimi qiymətləndirilir. Görüşün detalları barədə əlavə məlumat açıqlanmayıb.
İran-ABŞ gərginliyində yeni diplomatik siqnallar. ABŞ Prezidenti Donald Tramp İranla münaqişənin "tez başa çatacağını" proqnozlaşdırıb və bildirib ki, Tehrandan nüvə silahlarından imtina etdirmək siyasəti geniş dəstək görür. İran tərəfi isə ABŞ-ın təklifini nəzərdən keçirdiyini açıqlayıb.
Çinin süni intellekt sektoru yeni investisiya rekordu qeydə alıb. Pekin əsaslı süni intellekt şirkəti Moonshot AI 2 milyard dollar investisiya cəlb edərək şirkətin qiymətləndirməsini 20 milyard dollara çatdırıb. İnvestisiyaya Meytuan şirkətinin investisiya qolu Long-Z Investment rəhbərlik edib. Bu, Çinin açıq mənbə süni intellekt modellərinə artan marağının göstəricisi hesab olunur.
Avropa Komissiyası "Google"a qarşı işin gecikdirilməsinin siyasi təzyiqlə bağlı olduğunu rədd edib. Komissiyasının rəsmi nümayəndəsi Toma Renye bildirib ki, Rəqəmsal Bazarlar Aktı çərçivəsində aparılan iş ABŞ-ın təzyiqi ilə bloklanmayıb, qərarlar texniki hazırlıq tamamlandıqdan sonra qəbul edilir.
WUF13-ün təşkilatı ilə bağlı hazırlıqlar davam edir. BMT-nin Ümumdünya Şəhərsalma Forumunun 13-cü Sessiyasının təşkili üçün yaradılmış Təşkilat Komitəsinin iclası keçirilib. Prezident Administrasiyasının rəhbəri, Komitənin sədri Samir Nuriyev iclası açıb. Forum mayın 17-dən etibarən Bakıda keçiriləcək.