Saat 15:00 - Xəbər İcmalı
Türkiyənin vitse-prezidenti Cevdet Yılmaz gələn həftə Ermənistana tarixi səfər edəcək. Yılmaz mayın 4-də İrəvanda keçiriləcək Avropa Siyasi Birliyinin 8-ci sammitində Türkiyəni təmsil edəcək. Bu, Türkiyədən Ermənistana bu səviyyədə ilk rəsmi ziyarət olacaq. Sammit "Gələcəyi İnşa Etmək: Avropada Birlik və Sabitlik" mövzusunda keçiriləcək və iki ölkə arasında siyasi əlaqələrin inkişafı baxımından diqqət çəkən addım kimi qiymətləndirilir.
Azərbaycan-İtaliya enerji əməkdaşlığının strateji əhəmiyyəti Hörmüz böhranından sonra daha da artıb. Azərbaycan Prezidentinin xüsusi tapşırıqlar üzrə nümayəndəsi Elçin Əmirbəyov bildirib ki, geosiyasi qeyri-sabitlik dövründə təkcə enerji məhsullarına əlçatanlıq deyil, həm də təchizat marşrutlarının etibarlılığı önəm daşıyır. Əmirbəyov vurğulayıb ki, bu şəraitdə Azərbaycanın enerji tərəfdaşı kimi rolu daha aydın şəkildə üzə çıxır.
Niderlandın Azərbaycandakı səfiri Marian de Yonq Qarabağ və Şərqi Zəngəzura səfərinin təəssüratlarını bölüşüb. Səfir bildirib ki, bu onun Qarabağa ikinci səfəridir və Şuşadan xoş təəssüratlar aldığını qeyd edib. De Yonq həmçinin Niderlandın Azərbaycanla iqtisadi əməkdaşlığın müxtəlif sahələrində, xüsusilə energetika sahəsində yeni istiqamətlərin müəyyənləşdirilməsində maraqlı olduğunu vurğulayıb. Çilinin müvəqqəti işlər vəkili Xuan Karlos Salazar Alvares də eyni səfər çərçivəsində ilk dəfə Qarabağda olduğunu və iki ölkə arasında çoxtərəfli platformalarda əməkdaşlığın inkişaf etdiyini bildirmişdir.
Zaqatalada canavar hücumu qeydə alınıb. 47 yaşlı kənd sakini Aydın Qurbanov bu gün səhər saatlarında Car kəndinin Axaxdərə yaşayış məntəqəsində evin həyətyanı sahəsində canavarla qarşı-qarşıya gəlib. Hücum nəticəsində ağır xəsarətlər alan Qurbanov xəstəxanaya yerləşdirilib.
Bakının İçərişəhər ərazisində Beynəlxalq Xalça Festivalı başlayıb. "Azərxalça" ASC və "İçərişəhər" Dövlət Tarix-Memarlıq Qoruğu İdarəsinin birgə təşkil etdiyi festival Azərbaycanın qədim xalçaçılıq sənətini dünyaya tanıtmaq və beynəlxalq təcrübə mübadiləsi məqsədi daşıyır. Bundan əlavə, Azərbaycan Mərakeşin paytaxtı Rabatda keçirilən 31-ci Beynəlxalq Nəşriyyat və Kitab Sərgisində də iştirak edir - pavilyonda ölkənin zəngin mədəni və ədəbi irsi nümayiş etdirilir.