Saat 3:00 - Xəbər İcmalı
Tramp İrana qarşı hücumları iki həftəlik dayandırmağa hazır olduğunu açıqlayıb. ABŞ Prezidenti Donald Tramp Tehran tərəfindən Hörmüz boğazının tam, dərhal və təhlükəsiz şəkildə açılması şərti ilə İrana qarşı bombardmanları iki həftəlik dayandırmağa hazır olduğunu bildirib. Tramp eyni zamanda amerikan mətbuatına verdiyi bəyanatda, bu gün danışıqlarda irəliləyiş olacağı və konkret nəticə əldə ediləcəyi təqdirdə vəziyyətin dəyişə biləcəyini ifadə edib. Bundan başqa, ABŞ prezidenti İranın mülki infrastrukturuna mümkün zərbələrin iki həftə təxirə salındığını "X" sosial şəbəkəsində təsdiqləyib. Bununla belə, Tramp əvvəlcə "Truth Social" hesabında "Bu gecə böyük bir sivilizasiya məhv olacaq və bir daha geri qaytarılmayacaq" kimi sərt xəbərdarlıq da paylaşmışdı.
Pakistan Baş naziri Şahbaz Şərif Trampa müraciət edərək İrana verilən müddətin uzadılmasını xahiş edib. Bu çağırış Hörmüz boğazının bağlanması ilə bağlı gərginliyin pik nöqtəyə çatdığı bir vaxtda səslənib. Şərif ABŞ prezidentindən İrana verilən müddətin iki həftə uzadılmasını istəyib. Bu, bölgə ölkələrinin diplomatik yollarla gərginliyin azaldılmasına çalışdığını göstərən əhəmiyyətli addım kimi qiymətləndirilir.
İsrail Tehrandakı sinaqoqun vurulmasını etiraf edib. İsrail Müdafiə Ordusu Tehrandakı yəhudi sinaqoquna endirilən zərbəyə aidiyyətini təsdiqləyib və hədəfin əslində yüksəkrütbəli İran komandanı olduğunu bildirib. Ordu yaxınlıqda yerləşən sinaqoqun dağılmasına görə təəssüfünü ifadə edib. "The Times of Israel" nəşri bu bəyanatı dərc edib.
Mahşəhr neft-kimya zonası yenidən hücuma məruz qalıb. İranın cənub-qərbindəki Xuzistan əyalətinin Mahşəhr limanındakı xüsusi neft-kimya zonasına növbəti zərbə endirilib. Mahşəhr Neft-Kimya Xüsusi İqtisadi Zona Təşkilatının rəsmi məlumatına görə, Əmir Kəbir Neft-Kimya Şirkətinin vahidlərindən biri ABŞ-İsrail hücumu nəticəsində zədələnib.
İranlı hakerlər ABŞ-ın kritik infrastrukturunu hədəf alır. FBI, Milli Təhlükəsizlik Agentliyi, CISA və ABŞ Energetika Nazirliyi birgə məlumat yayaraq, İran tərəfindən dəstəklənən hakerlərin Amerika kritik infrastruktur sistemlərinə hücumlarını artırdığını və pozuculuq yaratmağı hədəflədiyini xəbərdarlıq edib. Bu, hərbi münaqişənin kiber müstəvidə də genişləndiyini göstərir.
"Brent" markalı neftin qiyməti kəskin düşüb. Londonun "ICE" birjasında "Brent" markalı xam neftin fyuçerslərinin qiyməti 6,17 faiz ucuzlaşaraq barrel üçün 103 dollara geriləyib. Trampın hücumları dayandırmağa hazır olduğuna dair açıqlamasının bazarlarda gərginliyin azalmasına təsir etdiyi güman edilir.