Saat 13:00 - Xəbər İcmalı
İsrail İranın hava müdafiə sistemlərini geniş miqyasda məhv edib. İsrail Müdafiə Qüvvələri İranın hava hücumlarından müdafiə qüvvələrinə aid 130-dan çox zenit-raket kompleksini məhv etdiyini açıqlayıb. IDF zərbələrin videogörüntülərini öz sosial şəbəkə hesabında yayımlayıb. Bu, İran-İsrail müharibəsinin 39-cu günündə İranın müdafiə potensialına ciddi zərbə kimi qiymətləndirilir.
ABŞ Prezidenti Trampın İranın mülki infrastrukturunu hədəf almaqla bağlı təhdidi İranda güclü reaksiyaya səbəb olub. Trampın "bir gecədə məhv edərik" açıqlamasından sonra İranda elektrik stansiyaları ətrafında "insan zənciri" çağırışı edilib. İran dövlət televiziyası xalqı strateji obyektlərin müdafiəsinə səfərbər etməyə çalışır.
İsrailin kəşfiyyat xidməti "Mossad" İran ərazisində vurulmuş amerikalı pilotların xilas edilməsində iştirak edib. "F-15E" qırıcı təyyarəsinin İran üzərində vurulmasından sonra iki amerikalı pilotun axtarışı və xilas edilməsi əməliyyatını İsrail silahlı qüvvələri ilə birgə "Mossad" həyata keçirib. Bu barədə ABŞ-nin İsraildəki səfiri Mayk Hakabi məlumat verib.
İran Qızılay Cəmiyyəti ABŞ və İsrail hücumlarının vurduğu ziyanın miqyasını açıqlayıb. Məlumata görə, 98 min ticarət obyekti, 763 təhsil mərkəzi və məktəb, həmçinin 326 səhiyyə müəssisəsi zərər görüb. Qızılayın sözçüsü Müctəba Xalidi bu rəqəmləri ictimaiyyətə təqdim edib.
Azərbaycan Prezidenti İlham Əliyevin aprelin 6-da Gürcüstana dövlət səfəri iki ölkə arasındakı strateji tərəfdaşlığın yeni mərhələsini nümayiş etdirib. Səfər Cənubi Qafqazda əməkdaşlığın dərinləşdiyini təsdiqləyib. Milli Məclisin deputatı Vüqar Rəhimzadə bildirib ki, Azərbaycan-Gürcüstan dostluğu dərin ənənələr üzərində qurulub və bütün sahələrdə uğurla inkişaf edir.
Əfqanıstanın Nənqərhar vilayətində güclü leysan yağışları nəticəsində ən azı 13 nəfər həlak olub, 19 nəfər yaralanıb. "Baxtar" agentliyinin məlumatına görə, qurbanların sayı zərər çəkmiş rayonlardan yeni məlumatlar daxil olduqca artа bilər. Hakimiyyət orqanları zərərçəkənlərə yardım göstərir.