Tramp İrana 48 saat vaxt verib: "Bütün cəhənnəm onların üzərinə çökəcək"
ABŞ Prezidenti Donald Tramp İrana saziş bağlamaq və ya Hörmüz boğazını açmaq üçün 48 saat vaxt verib. Tramp "Truth Social" platformasında yazdığı mesajda xatırladıb ki, əvvəlcə İrana 10 gün vaxt vermişdi və bu müddət artıq bitmək üzrədir. "Vaxt daralır, bütün cəhənnəm onların üzərinə çökməzdən əvvəl son 48 saat qalıb" - deyə ABŞ lideri xəbərdarlıq edib. Bu açıqlama ABŞ-İran gərginliyinin yeni zirvəyə çatdığını göstərir.
Livanda İsrail zərbələri nəticəsində ölənlərin sayı 1 400-ü keçib
Livanın Səhiyyə Nazirliyi açıqlayıb ki, İsrail ordusunun ölkənin cənubuna endirdiyi zərbələr nəticəsində son 24 saatda azı 54 nəfər həlak olub, 156 nəfər yaralanıb. Nazirliyin məlumatına görə, martın 2-dən - hərbi eskalasiyanın başlanğıcından bəri ölənlərin ümumi sayı 1 400-ü ötüb.
Çinin İrana raket materialları göndərdiyi iddia edilir
ABŞ, İsrail və İran arasındakı gərginlik 36-cı gününə daxil olarkən, Çinin İrana raket istehsalında istifadə olunan strateji əhəmiyyətli materiallar göndərdiyi iddiası ortaya çıxıb. The Telegraph qəzetinin dənizçilik məlumatlarına əsaslanan xəbərinə görə, Çindən yola çıxan gəminin natrium perklorat daşıdığı irəli sürülür. Bu maddə raket yanacağı istehsalında istifadə olunur.
Paşinyan: Qarabağ hərəkatı Ermənistan üçün geosiyasi tələ idi
Ermənistanın Baş naziri Nikol Paşinyan "Vətəndaş müqaviləsi" Partiyasının 8-ci növbədənkənar konfransında Qarabağ hərəkatının ölkəsi üçün geosiyasi tələ olduğunu bəyan edib. Paşinyanın sözlərinə görə, onlar Ermənistanı sülhə gətirərək bu tələdən çıxara biliblər.
Almaniyada kişilərə xaricə çıxış məhdudiyyəti qüvvəyə minib
2026-cı ilin əvvəlindən Almaniyada 17-45 yaş arası kişilərin ölkədən üç aydan artıq müddətə çıxışına qadağa tətbiq olunub. Qanuna edilən yenilik təhsil, iş və səyahət məqsədilə uzunmüddətli səfərlərin hamısına şamil olunur. Kişilər ölkədən çıxmaq üçün xüsusi icazə almalı olacaqlar.
Azərbaycanın yeniyetmə cüdoçuları Avropa Kubokunda 13 medal qazanıb
Gəncədə keçirilən Avropa Kubokunda Azərbaycanın yeniyetmə cüdoçuları ilk yarış günündə 1 qızıl, 4 gümüş və 8 bürünc olmaqla ümumilikdə 13 medal əldə ediblər. Rza Xəlilov 55 kq çəki dərəcəsində qızıl medal qazanaraq ən uğurlu nəticəni göstərib.