ABŞ və İsrailin İrana hava hücumları: 34 nəfər həlak olub
ABŞ və İsrail gecə saatlarından etibarən İranın müxtəlif bölgələrinə hava zərbələri endirib. İlkin məlumatlara görə, hücumlar nəticəsində 34 nəfər həyatını itirib. ABŞ Silahlı Qüvvələrinin Mərkəzi Komandanlığı (US CENTCOM) İrandakı strateji-hərbi obyektlərə hədəflənmiş aviazərbələrin görüntülərini rəsmi səhifəsində yayıb. Xüsusilə Tehran vilayətinin Baharestan rayonunda ölənlərin sayı 15 nəfərə yüksəlib - bunu rayonun qubernatoru Əbdülhəmid Şərəfi yerli mediaya açıqlayıb. İsrail Müdafiə Ordusu həmçinin İranın üç hava limanına - Bəhram, Mehrabad və Azmayeş hava limanlarına zərbələr endirərək hərbi obyektləri və aviasiya texnikasını vurduğunu bildirib.
SEPAH kəşfiyyat rəhbəri Məcid Xademi öldürülüb
İsrail müdafiə naziri İranın İslam İnqilabı Keşikçilər Korpusunun (SEPAH) kəşfiyyat xidmətinin rəhbəri, ordu generalı Məcid Xademinin öldürüldüyünü təsdiqləyib. "Times of Israel"in məlumatına görə, Xademi Tehrana səhər saatlarında endirilən hava zərbələrindən biri nəticəsində həlak olub. İranın rəsmi media orqanları da Xademinin ölümünü təsdiqləyərək hücumda İsrail və ABŞ-ı günahlandırıb. Xademi keçən il iyun ayından etibarən SEPAH kəşfiyyatına rəhbərlik edirdi.
Netanyahu: Müharibə tam gücü ilə davam edəcək
İsrail baş naziri Benyamin Netanyahu İrana qarşı müharibənin tam gücü ilə davam edəcəyini bəyan edib. Netanyahu bunu öz "X" sosial şəbəkə səhifəsində yazıb. Baş nazir SEPAH kəşfiyyat rəhbəri Məcid Xademinin məhv edilməsini xüsusi vurğulayaraq, İsrailin hərbi əməliyyatlarını davam etdirəcəyini bildirmişdir.
İran cavab olaraq İsrailin mərkəzini raketlərlə hədəfə alıb
İran növbəti dəfə İsrailə ballistik raketlərlə hücum edib və bu dəfə ölkənin mərkəzi bölgəsi hədəfə alınıb. Kaset başlıqlı raketlər Ramat Qan, Qivatayim, Bney Brak və Petah Tikva şəhərlərində dağıntılara səbəb olub. SEPAH "Doğru Vəd 4" əməliyyatının 98-ci mərhələsi çərçivəsində Tel-Əvivin şimal və cənubu, həmçinin Hayfada strateji mövqelərin atəşə tutulduğunu açıqlayıb. Gecə saatlarında Hayfaya da ballistik raketlər atılıb.
İrandan Azərbaycana 3 322 nəfər təxliyə olunub
Bölgədəki gərginlik fonunda İrandan Azərbaycana fevralın 28-dən aprelin 6-dək ümumilikdə 3 322 nəfər təxliyə olunub. Təxliyə olunanların 575 nəfəri Azərbaycan vətəndaşıdır. Qalan şəxslər isə onlarla fərqli ölkənin vətəndaşlarından ibarətdir. Təxliyə prosesi davam edir.