Zəngilana növbəti köç karvanı yola salındı

Prezident İlham Əliyevin tapşırıqları əsasında işğaldan azad edilmiş ərazilərə Böyük Qayıdış proqramı davam edir. Bu proqram çərçivəsində Zəngilan rayonuna növbəti köç karvanı yola salınıb.

Bu mərhələdə Zəngilan rayonunun Məmmədbəyli kəndinə 30 ailə - 144 nəfər köçürülüb. Bu ailələr, uzun illər ərzində respublikanın müxtəlif yerlərində müvəqqəti məskunlaşmışdılar. Onlar əsasən yataqxanalarda, sanatoriya və inzibati binalarda yaşayırdılar. Doğma yurda qayıdan sakinlər, onlara göstərilən hərtərəfli dövlət qayğısı üçün Prezident İlham Əliyevə və Birinci vitse-prezident Mehriban xanım Əliyevaya təşəkkürlərini bildiriblər.

Sakinlər həmçinin torpaqlarımızı işğaldan azad edən rəşadətli Azərbaycan Ordusuna minnətdarlıqlarını çatdırıblar. Onlar qəhrəman əsgər və zabitlərimizi yad edib, bu yolda canlarından keçən şəhidlərimizə rəhmət diləyiblər. Məmmədbəyli kəndinə köçün həyata keçirilməsi bölgədə həyatın bərpası istiqamətində atılan vacib addımlardan biridir.