Yeni nazir təqdim olundu - FOTO

Naxçıvan Muxtar Respublikası səhiyyə nazirinin müavini, hazırda nazir vəzifələrini müvəqqəti icra edən Rəşadət Nabatov kollektivə təqdim edildi. Təqdimat mərasimində Naxçıvan Muxtar Respublikası Baş nazirinin birinci müavini Elşad Əliyev çıxış etdi.

Elşad Əliyev Prezident İlham Əliyevin rəhbərliyi ilə ölkədə aparılan uğurlu sosial-iqtisadi islahatlardan bəhs etdi. O, xüsusilə "Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı" çərçivəsində həyata keçirilən genişmiqyaslı tədbirləri vurğuladı. Onun sözlərinə görə, səhiyyənin müasir tələblər əsasında inkişafı dövlət proqramında əsas prioritetlərdən biri kimi müəyyən edilib. Bununla belə, səhiyyə sektorunda nəzərdə tutulan vəzifələrin icrasında bəzi gecikmələr və qeyri-dəqiqliklər müşahidə olunub.

Baş nazirin birinci müavini bildirdi ki, mövcud imkanlardan daha effektiv şəkildə istifadə edilməlidir. Qarşıya qoyulan tapşırıqlar operativ və düzgün həyata keçirilməlidir. Əhaliyə göstərilən tibbi xidmətin keyfiyyəti müasir tələblərə uyğunlaşdırılmalıdır. Elşad Əliyev bu işlərin icrasında kollektivə uğurlar arzuladı. Rəşadət Nabatov göstərilən yüksək etimada görə təşəkkürünü bildirdi. Yeni rəhbərlikdən gözlənilən əsas məqsəd səhiyyə xidmətlərinin səviyyəsini yüksəltməkdir.