Valideynlər üçün vacib xəbər: Elektron Yerdəyişmə Prosesi başlayır

Noyabrın 1-i saat 11:00-dan etibarən, II-XI sinif şagirdlərinin elektron yerdəyişmə prosesi başlayır.

Şagirdlərin yerdəyişməsi prosesi www.sy.edu.az saytı vasitəsilə həyata keçiriləcək.

Məktəbəqədər və Ümumi Təhsil üzrə Dövlət Agentliyinin direktoru Eşqi Bağırov oktyabrın 29-da keçirilən brifinqdə bildirib ki, noyabrın 1-dən dekabrın 1-dək 10-cu siniflərə qeydiyyat üçün gecikən şagirdlər də sy.edu.az saytı vasitəsilə ümumi təhsil müəssisələrinə qəbul üçün müraciət edə bilərlər.

Məktəbəhazırlıq qrupları və 1-ci siniflərin yerdəyişməsi prosesi isə noyabrın 25-i saat 11:00-dan etibarən aktiv ediləcək.

2024-2025-ci tədris ilində tətbiq edilən yeni sistemə əsasən, istifadəçilərin fərdi məlumatlarının təhlükəsizliyinin artırılması məqsədilə Azərbaycan Respublikası vətəndaşları və ölkə ərazisində müvəqqəti və daimi yaşama icazəsi olan xarici ölkə vətəndaşlarının şəxsi kabinetə “istifadəçi adı və şifrə” ilə daxil olması məhdudlaşdırılacaq.

Şəxsi kabinetə giriş yalnız Rəqəmsal İnkişaf və Nəqliyyat Nazirliyi tərəfindən təmin edilən Vahid Giriş Sistemi (“Digital Login”) ilə həyata keçiriləcək.

Vətəndaşların tətbiq edilən yeniliklə tanış olması üçün oktyabrın 31-i saat 15:00-dan etibarən sy.edu.az saytında şəxsi kabinet yaratmaq və mövcud kabinetə “Digital Login” vasitəsilə daxil olmaq funksiyası aktiv ediləcək.