“Univermaqda nə POS-terminal var, nə də çek verilir” - ŞİKAYƏT

Bakının mərkəzi ticarət obyektlərindən biri olan “Moskva” Univermağında qızıl satışı ilə məşğul olan mağazalar POS-terminal istifadə etməməklə qanunları pozurlar. Bu barədə bir vətəndaş şikayət edib. O, qızıl məmulatının ödənişini nağdsız etmək istəsə də, satıcılar mağazada POS-terminalın olmadığını bildiriblər. Şikayətçinin sözlərinə görə, ona yalnız nağd ödəniş və ya kartdan-karta köçürmə təklif edilib. Hətta yaxınlaşdığı digər vitrinlərdəki satıcılar da eyni cavabı veriblər.

Vətəndaş bildirib ki, satıcılar POS-terminal tapılarsa, ödəniş məbləğinin nağd qiymətdən daha yüksək olacağını söyləyiblər. Bu vəziyyət alıcının alışdan imtina etməsinə səbəb olub. Ən ciddi məsələlərdən biri isə, heç nağd pul ilə qızıl alan kəslərə belə çek verilməməsi faktıdır. Bu ticarət nöqsanı, həm ödəniş şəffaflığını, həm də vergi intizamını pozur. Məsələ ilə bağlı “Moskva” Univermağının mətbuat xidmətinə sorğu göndərilib.

Qüvvədə olan qanunvericilik bu cür halları qadağan edir. Nazirlər Kabinetinin 2012-ci il tarixli 219 nömrəli qərarı ilə təsdiqlənmiş “POS-terminallar quraşdırılacaq obyektlərin müəyyənləşdirilməsi meyarları” bu sahədəki qaydaları müəyyən edir. Bu meyarlara görə, dövriyyəsindən və ərazisindən asılı olmayaraq ƏDV ödəyicilərinin bütün təsərrüfat subyektlərində POS-terminal quraşdırılması məcburidir. Əlavə olaraq, rüb üzrə orta aylıq dövriyyəsi 2.000 manatdan çox olan vergi ödəyicilərinin bütün obyektlərində də POS-terminal olmalıdır. Qızıl mağazalarının bu şərtləri ödəməməsi birbaşa vergi pozuntusudur.

Vergi Məcəlləsi bu qaydaları pozanlara qarşı ciddi cəzalar tətbiq edir. POS-terminalın quraşdırılmasının məcburi olduğu obyektlərdə ödənişlərin qəbulundan imtina edildikdə və ya terminal ümumiyyətlə quraşdırılmadıqda, maliyyə sanksiyaları tətbiq edilir. Təqvim ili ərzində ilk dəfə belə hallara yol verildikdə cərimə 1 000 manat təşkil edir. İkinci dəfə pozuntu 3 000 manat, üçüncü və daha çox dəfə təkrarlandıqda isə 6 000 manat maliyyə sanksiyası nəzərdə tutulur. Bu cəzalar göstərir ki, nağdsız ödənişlərdən imtina etmək bizneslər üçün olduqca baha başa gələ bilər.