Türkiyənin 1 milyondan çox dronu var? - "Qarabağa baxsınlar"

Yunanıstanın müdafiə naziri Nikos Dendias Türkiyənin hərbi potensialı, xüsusən də PUA texnologiyaları haqqında vacib açıqlamalar verib. O, Prezident Rəcəb Tayyib Ərdoğanın Türkiyəyə böyük uğurlar qazandırdığını və ölkənin bu sahədə ciddi irəliləyişlər əldə etdiyini bildirib. Əldə edilən məlumata görə, Türkiyə hazırda 1 milyondan çox drona sahibdir.

Dendias dron texnologiyasının müasir döyüş meydanına təsirini xüsusi vurğulayıb. Bu təsirə dair ən bariz nümunə kimi o, Qarabağ müharibəsini göstərib. Nazirin sözlərinə görə, kimsə nələrin baş verə biləcəyini anlamaq istəyirsə, sadəcə Qarabağda olanlara baxa bilər.

Dendias həmçinin əlavə edib ki, bu nümunə atəş açmadan bir müharibəni necə uduzmağın mümkün olduğunu göstərir. O, "Bayraktar TB2" dronlarının effektivliyini qeyd edərək, onların Suriya, Liviya, Qarabağ və Ukraynadakı Rusiya hava hücumundan müdafiə sistemlərini üstələdiyini deyib. Nəticədə bu dronlar milyardlarla dollar ziyana səbəb olublar.