Su ilə bağlı bu fikir yanlış imiş

Populyar olan "Gündə 3 litr su içmək lazımdır" fikri elmi baxımdan hər kəs üçün keçərli bir norma deyil. Qida eksperti Fərid Səfərovun sözlərinə görə, bədənin su ehtiyacı çox individualdır. Bu, geniş yayılmış qaydadır, lakin universal standart hesab edilməməlidir. Suya tələbat üç əsas amildən asılı olaraq dəyişir. İnsanlar özlərinə zərər verə biləcək ümumi bir qaydaya əməl etmək əvəzinə, fərdi ehtiyaclarını hesablamalıdırlar.

Ekspert su ehtiyacını müəyyən edən amilləri göstərdi. Birincisi, bədən çəkisi nəzərə alınmalıdır; hər kiloqram çəkiyə təxminən 30-35 ml su tələb olunur. İkincisi, hava şəraiti böyük rol oynayır. İsti havalarda tərləmə artdığı üçün daha çox su lazım olur, soyuq havalarda isə əksinə, su ehtiyacı bir qədər azalır. Üçüncüsü, fiziki aktivlik önəmlidir. İdmanla məşğul olan və çox tərləyən bir şəxsin suya tələbatı gündə 1-1.5 litrə qədər arta bilər.

Niyə hər kəsin gündə 3 litr su içməsi düzgün deyil? Ekspert qeyd etdi ki, aşağı bədən çəkisinə malik insanlar üçün bu həcm artıq yük yarada bilər. Məsələn, çəkisi 45-55 kq olan bir qadın üçün 3 litr su böyrəklərə həddindən artıq yük sala bilər. Çox su içmək natrium səviyyəsinin azalmasına səbəb olur. Bu da halsızlıq və başgicəllənmə kimi nəticələr verə bilər. Buna görə də, fərdi vəziyyəti düşünmədən, sadəcə rəqəmə əsaslanaraq su içmək risklidir.

F. Səfərov yetərincə su içdiyimizi necə anlamağın ən təhlükəsiz və dəqiq yolunu açıqlayıb. Ən yaxşı göstərici sidiyin rəngidir; rəng açıq saman rəngi olmalıdır. Tünd sarı rəng az su içməyin, tam şəffaf rəng isə bəlkə də həddindən artıq içməyin göstəricisidir. Digər əlamətlər ağız quruluğunun olmaması, baş ağrısının azalması və enerji səviyyəsinin stabil olmasıdır. Beləliklə, "gündə 3 litr iç" qaydası elmi standart deyil. Gündə 1.5-2.5 litr su bədən çəkisindən və şəraitdən asılı olaraq dəyişən normal bir rəqəmdir.