Qırmızı Ürəklər Fondunun “Zəfər Payı” aksiyası öz məqsədinə çatdı

Qırmızı Ürəklər Fondunun 8 Noyabr – Zəfər Günü münasibətilə həyata keçirdiyi “Zəfər Payı” xeyriyyə aksiyası yekunlaşıb. Bu təşəbbüs sayəsində fond cəmiyyətdən böyük dəstək görərək müəyyən edilmiş məqsədə çatdı.

Aksiya çərçivəsində cəmi 10 503 manat vəsait toplanıldı. Bu məbləğ Birbank mobil tətbiqi üzərindən 593 nəfər yardımsevərin ianəsi ilə əldə edilib. Toplanan pul dərhal ərzaq paketlərinə çevrildi və fondun könüllüləri tərəfindən 252 aztəminatlı qazi ailəsinə çatdırıldı. Bu vəsaitin toplanması və paylanması prosesi oktyabrın 31-dən noyabrın 8-i 2025-ci il tarixlərinə qədər davam etdi.

“Zəfər payı” aksiyasının əsas məqsədi Vətən müharibəsində iştirak etmiş qəhrəmanlara dəstək vermək idi. Eyni zamanda, fond bu yolla xalqımızın güclü yardımlaşma ənənəsini yaşatmağı hədəfləyirdi. Xeyriyyəçilik mədəniyyətinin yayılması Red Hearts Fondunun ali məqsədlərindən biridir.

“Red Hearts” – Qırmızı Ürəklər Fondu 2020-ci ildə Kapital Bank-ın bir qrup əməkdaşı tərəfindən könüllü qrupu olaraq fəaliyyətə başladı. Fond elə həmin ildə dövlət qeydiyyatına alındı. Təşkilat ölkəmizdə ianəçilik mədəniyyətinin formalaşmasına xidmət edir. Fond təhsil, maarifləndirmə və ətraf mühitin mühafizəsi kimi cəmiyyətin həssas mövzularına dair sosial təşəbbüslərlə çıxış edir.