Prezidentin qızları və gəlini ekoloji aksiyalarda iştirak etdi

Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva, Bakı Media Mərkəzinin rəhbəri Arzu Əliyeva və Alena Əliyeva Lənkərana səfərləri zamanı bir sıra ekoloji tədbirlərdə iştirak etdilər. Səfər çərçivəsində iki əsas aksiya baş tutdu: "Yaşıl Marafon" çərçivəsində ağacəkmə və Hirkan Milli Parkında heyvanların təbiətə buraxılması. Əvvəlcə IDEA İctimai Birliyi tərəfindən Lənkəran rayonunun meşə ərazisində geniş ağacəkmə tədbiri təşkil olundu. Bu aksiyada könüllülərlə birlikdə 1350 ədəd Eldar şamı tingi torpağa əkildi. Tədbir zamanı verilən məlumatlara görə, bu cür işlər yaşıllıq zolaqlarının genişləndirilməsinə, meşə fondunun bərpasına və ekosistemin mühafizəsinə böyük töhfə verir.

"Yaşıl Marafon" IDEA İctimai Birliyi və Ekologiya və Təbii Sərvətlər Nazirliyinin birgə təşkilatçılığı ilə həyata keçirilir. Bu respublika miqyaslı proqramın əsas hədəfi yaşıllıq sahələrini artırmaq, ağacəkmə ənənəsini təbliğ etmək və ətraf mühitin qorunması haqqında maarifləndirməyə yardım etməkdir. Proqram ölkənin flora biomüxtəlifliyinin zənginləşdirilməsini qarşısına məqsəd qoyur. Məlumatlara əsasən, "Yaşıl Marafon" çərçivəsində 2025-ci ilin payız və 2026-cı ilin yaz əkin mövsümləri ərzində ölkə üzrə təxminən 2 milyon ağacın əkilməsi planlaşdırılır. Bu genişmiqyaslı işlər Azərbaycanın təbiətə qayğı göstərmək və yaşıllıqları qorumaq öhdəliyini göstərir.

Ağacəkmə aksiyasından sonra Hirkan Milli Parkında biomüxtəlifliyin zənginləşdirilməsi məqsədi daşıyan xüsusi bir tədbir keçirildi. Aksiya çərçivəsində 2 yenot, 2 tülkü və 4 tirəndaz təbii mühitə buraxıldı. Yenotlar bir müddət əvvəl iaşə obyektlərində qanunsuz saxlanıldığı aşkarlanmış və xilas edilmişdi. Həmin heyvanlar 4 ay Bakı Zooloji Parkında müalicə və reabilitasiya keçdikdən sonra tam sağalıb təbiətə geri qaytarıldı. Vətəndaşlar tərəfindən yaralı halda tapılıb Zooloji Parka təhvil verilən tülkülər də vardı. Onlar bir il müddətində klinik şəraitdə müayinə və müalicədən sonra uğurla təbii mühitə buraxıldı.

Hirkan Milli Parkına buraxılan heyvanlar arasında tirəndazlar xüsusi əhəmiyyətə malikdir. Bu növ vaxtilə Azərbaycan Respublikasının "Qırmızı kitab"ına daxil edilmişdi. Ölkədə həyata keçirilən mühafizə tədbirləri nəticəsində bu vəhşi heyvanların sayı artıb və növ "Qırmızı kitab"dan çıxarılıb. Milli Parka buraxılan fərdlər Bakı Zooloji Parkında çoxaldılmış və təbii populyasiyası bərpa olunan heyvanlardır. Bütün bu ekoloji tədbirlər IDEA İctimai Birliyi tərəfindən Azərbaycanda ətraf-mühitin mühafizəsi və biomüxtəlifliyin qorunması istiqamətində müntəzəm olaraq görülən işlərin tərkib hissəsidir.