Piyadaların vurulması ilə bağlı statistika açıqlandı

Baş Dövlət Yol Polisi İdarəsi (BDYPİ) bu ilin doqquz ayı ərzində ölkədə baş verən yol-nəqliyyat hadisələri barədə statistika yayıb. Məlumatlara görə, piyadaların vurulması ilə nəticələnən qəzalar ümumi yol qəzalarının əhəmiyyətli bir hissəsini tutur. Respublika üzrə bu hadisələr ümumi qəzaların 39,1 faizini təşkil edib. Lakin Bakı şəhəri üzrə vəziyyət daha ağırdır. Paytaxtda qeydə alınan qəzaların 59.6 faizi məhz piyadaların vurulması ilə nəticələnib.

BDYPİ qeyd edir ki, bu yüksək rəqəmlərin formalaşmasında təəssüf ki, piyadaların məsuliyyətsizliyi böyük rol oynayıb. Xüsusilə piyadaların keçidlərin yaxınlığında vurulması halları şəxsi məsuliyyət məsələsinin aktuallığını yenidən gündəmə gətirir. Qurum bildirir ki, yol hərəkəti prosesində hər kəs, o cümlədən piyadalar öz təhlükəsizliklərini təmin etmək üçün öz qaydalarına ciddi riayət etməlidirlər. Bu hadisələr bir daha göstərir ki, vətəndaşlar daha diqqətli davranmalıdırlar.

Baş Dövlət Yol Polisi İdarəsi bir daha bütün piyadalara müraciət edir. İdarə onlardan yolu yalnız nəzərdə tutulmuş yerlərdən keçməyi, habelə sutkanın qaranlıq vaxtı xüsusilə ehtiyatlı olmağı xahiş edir. Yolu keçərkən diqqəti yayındıran hərəkətlərdən çəkinmək, yəni mobil telefon və ya qulaqcıqdan istifadə etməmək vacibdir. Eyni zamanda, qəflətən avtomobil yoluna çıxmamaq barədə xəbərdarlıq edilir. BDYPİ müraciətinin sonunda belə bir çağırış edib: "Unutmayın, sizin həyat və sağlamlığınız özünüz, doğmalarınız və cəmiyyətimiz üçün çox dəyərlidir!".