Oyunçular da istintaqa cəlb edilir - Türkiyədə qalmaqal

İstanbul Baş Prokurorluğu Türkiyə futbolunda mərc araşdırmasını xeyli genişləndirib. İndi təkcə hakimlər deyil, onların qohumları, həmçinin məşqçilər və futbolçular barədə də araşdırma aparılacaq.

Bu böyük istintaq Türkiyə Futbol Federasiyasının (TFF) prezidenti İbrahim Hacıosmanoğlunun verdiyi açıqlamadan sonra başladı. Hacıosmanoğlu peşəkar liqalarda işləyən 571 aktiv hakimdən 371-nin mərc hesabı olduğunu bildirdi. Bundan əlavə, bu hakimlərin 152-si aktiv şəkildə mərc oynayırdı. Bu rəqəmlər problemin nə qədər ciddi olduğunu göstərdi. Verilən məlumata görə, Prokurorluğun araşdırdığı siyahıda artıq bir çox futbolçunun adının olduğu irəli sürülüb.

Türkiyə futbolunda mərc iddiaları ilk dəfə TFF 2-ci Liqasının 2023-2024 mövsümündə oynanılan şübhəli bir matçdan sonra gündəmə gəlmişdi. Söhbət “Sincan Bələdiyyəsi Ankaraspor” ilə “Nazilli Bələdiyyəspor” arasında keçirilən oyundan gedir. Həmin oyun qolsuz, 0-0 hesabı ilə başa çatmışdı. Ən diqqətçəkən detal isə matç boyu qapıya heç bir zərbənin endirilməməsi idi. Bu nəticə “Nazilli Bələdiyyəspor”un 2-ci Liqada qalmasını təmin etmişdi və bu da matçın nəticəsi ilə bağlı şübhələri daha da artırmışdı.