Onlar 30 ildir millət vəkilidir - FOTO

Azərbaycanda uzun müddət vəzifə tutan məmurlar olduğu kimi, Milli Məclisdə (MM) də stajlı deputatlar var. Parlament üzvlərinin yarıdan çoxu 20 ildir ki, deputat mandatı daşıyır. Lakin dörd millət vəkili bu göstəricini xeyli üstələyir. Onlar düz 30 ildir ki, qanunverici orqanda təmsil olunurlar.

Parlamentin ən stajlı deputatları Eldar İbrahimov, Ziyafət Əsgərov, Mixail Zabelin və İmamverdi İsmayılovdur. Bu şəxslərin hər biri ardıcıl olaraq yeddi dəfə deputat seçilib. Onların siyasi karyeraları 1995-ci ildən bəri davam edir. Eldar İbrahimov Naxçıvanda anadan olub. O, 1995-ci ildən bəri Milli Məclisin deputatıdır və Hakim Yeni Azərbaycan Partiyasının (YAP) üzvüdür. Hal-hazırda o, parlamentin İntizam komissiyasına rəhbərlik edir. Digər bir təcrübəli deputat, Ziyafət Əsgərov Naxçıvan Muxtar Respublikasının Babək rayonundandır. O da yeddi çağırış Milli Məclisin deputatı seçilib. Ziyafət Əsgərov hüquq elmləri doktoru və professordur, eyni zamanda YAP Siyasi Şurasının üzvüdür. Onun karyerasında mühüm bir dəyişiklik 2024-cü il sentyabrın 23-də baş verib, o, həmin tarixdən Milli Məclis sədrinin müavinidir. Hər iki deputat uzun illərdir Azərbaycanın siyasi həyatında aktiv iştirak edir.

Dörd stajlı deputatdan ikisi Mixail Zabelin və İmamverdi İsmayılovdur. Mixail Zabelin Bakıda anadan olub. O, ali təhsilli hidrorexnika-mühəndisidir və Azərbaycanda Rus İcmasının sədri vəzifəsini tutur. 80 yaşlı Zabelin uzun müddət YAP-ın fəal üzvü kimi tanınır, müxtəlif illərdə partiyanın Siyasi Şurasının və İdarə Heyətinin üzvlüyündə olub. İmamverdi İsmayılov 1958-ci ildə Zəngilan rayonunda doğulub. O, Bakı Dövlət Universitetinin Jurnalistika fakültəsini və Bakı Sosial İdarəetmə və Politologiya İnstitutunu bitirib. İsmayılov Yeni Azərbaycan Partiyasının üzvüdür. O, siyasi sahədə fəal olmasa da, ədəbi çevrələrdə kifayət qədər yaxşı tanınır.

İmamverdi İsmayılov Əməkdar jurnalist və “Qızıl qələm” mükafatı laureatıdır. Azərbaycan radiosunun “Qızıl fondu”nda onun müəllifi olduğu “Qədim kişinin qırxı”, “Astanada ölüm” və “Yurd gürzəsi” əsərləri əsasında hazırlanmış radio kompozisiyalar saxlanılır. Bu dörd şəxsin - Eldar İbrahimov, Ziyafət Əsgərov, Mixail Zabelin və İmamverdi İsmayılovun ardıcıl olaraq 7 çağırış parlamentdə təmsil olunması onların siyasi təcrübəsinin miqyasını açıq şəkildə göstərir.