Meyit donorun ürəyi transplantasiya edildi -Qafqazda ilk

Qafqaz regionunda tibb tarixində böyük bir hadisə baş verdi. Meyit donordan ürək transplantasiyası əməliyyatı ilk dəfə olaraq uğurla icra edildi.

Bu əməliyyat barədə məlumatı Səhiyyə Nazirliyi və Mərkəzi Klinika birgə yayıb. Proses Nazirliyin Orqan Donorluğu və Transplantasiyası üzrə Koordinasiya Mərkəzinə (OKM) 3 saylı Şəhər Kliniki Xəstəxanasında müalicə alan bir pasiyentə beyin ölümü diaqnozunun qoyulması barədə məlumat daxil olduqdan sonra başladı. Orqan Donorluğu və Transplantasiyası üzrə Koordinasiya Mərkəzi dərhal bütün aidiyyəti tədbirləri həyata keçirdi. Mərkəz orqan donorluğu və transplantasiyası prosesinin təşkili, həmçinin bütün əlaqələndirilməsi işini təmin etdi. Bu hadisə region üçün tibb sahəsində böyük irəliləyiş hesab olunur.

Beyin ölümü diaqnozu rəsmən təsdiqləndikdən sonra mərhumun ailəsi yüksək insanlıq nümunəsi göstərdi. Ailə orqanları bağışlamağa razılıq verdi. Məhz bu razılıq sayəsində Qafqaz regionunda ilk dəfə meyit donordan ürək köçürülməsi mümkün oldu. Ürək transplantasiyası əməliyyatı Mərkəzi Klinikada baş tutdu. Əməliyyat professor Kamran Musayevin rəhbərlik etdiyi ixtisaslı tibbi heyət tərəfindən yüksək peşəkarlıqla icra edildi.

Meyit donordan götürülən ürək 2006-cı il təvəllüdlü, Tovuz rayon sakininə köçürüldü. Bu hadisə ölkənin transplantologiya sahəsində yeni bir mərhələyə qədəm qoyduğunu nümayiş etdirir.