Məşhur müxalifətçilər Ərdoğanın partiyasına keçir

Türkiyə siyasətində gərginlik yenidən artıb. Əsas müxalifət partiyasının lideri, CXP sədri Özgür Özəlin Prezident Rəcəb Teyyub Ərdoğana qarşı səsləndirdiyi sərt ifadələr ölkədə qarşılıqlı ittihamlar dalğasına səbəb oldu. Bu qarşıdurmanın fonunda isə Prezident Ərdoğanın rəhbərlik etdiyi AKP sıralarının genişlənməsi gündəmin əsas mövzusu halına gəlib.

Son vaxtlar Türkiyənin aparıcı müxalifət partiyalarını təmsil edən xeyli sayda siyasi fəal AKP-yə qoşulub. Bu keçid edənlər arasında həm CXP-nin, həm də Yenidən Refah Partiyasının (YRP) bələdiyyə sədrləri var. Müxalifət daxilində istefaların kütləvi şəkil alması gözlənilir. Bu, hakimiyyət partiyasına qoşulmaların güclü bir tendensiya olduğunu göstərir.

Yenidən Refah Partiyasının sədri Fatih Ərbakan partiyasındakı bu istefalara münasibət bildirib. Siyasətçi açıqlamasında, bu ayrılmaların arxasında birbaşa Türkiyə hakimiyyətinin dayandığını iddia edib. Müxalifət liderlərinin Ərdoğanı hədəf aldığı bir dövrdə, AKP-nin heyətinin artması ölkə daxilində siyasi atmosferi daha da qızışdırır.