Kamil Mənsimov vəfat etdi - FOTO

“Şöhrət” ordeni ilə təltif edilmiş Kamil Mənsimov vəfat edib. Riyaziyyat elmləri doktoru, professor Mənsimov 13 noyabr tarixində dünyasını dəyişdi. O, riyazi kibernetika sahəsinin nüfuzlu nümayəndələrindən biri sayılırdı. Professor Mənsimov Elm və Təhsil Nazirliyinin İdarəetmə Sistemləri İnstitutunda Mürəkkəb Dinamik Sistemlərdə İdarəetmə Üsulları laboratoriyasına rəhbərlik edirdi. Onun elmi fəaliyyəti Azərbaycan elminin inkişafına mühüm töhfələr verib.

Kamil Bayraməli oğlu Mənsimov 1950-ci ildə Biləsuvarda anadan olub. O, təhsilini Bakı Dövlət Universitetində (BDU) alıb, mexanika-riyaziyyat fakültəsini fərqlənmə diplomu ilə bitirmişdi. Alim uzun illər Azərbaycan Milli Elmlər Akademiyasının Kibernetika İnstitutunda və BDU-da çalışdı. Bu müddət ərzində o, optimal idarəetmə, mürəkkəb sistemlər və riyazi kibernetika üzrə mühüm elmi araşdırmalara imza atdı.

Professor Mənsimov dinamik sistemlərdə optimallıq üçün ikinci tərtib şərtlərinin müəyyən edilməsi və müxtəlif tip proseslərdə idarə strategiyalarının tədqiqi kimi sahələrdə elmi məktəb yaratmış mütəxəssislərdən idi. Onun elmi irsi olduqca genişdir; bura 325 elmi iş və 5 monoqrafiya daxildir. O, eyni zamanda 12 fəlsəfə doktoru hazırlayıb. Ölkə qarşısındakı xidmətlərinə görə, Prezident İlham Əliyevin sərəncamları ilə professor Mənsimov “Tərəqqi” medalı və “Şöhrət” ordeni ilə təltif olunmuşdu.