İlham Əliyev müraciət ünvanladı

Prezident İlham Əliyev "Konstitusiya və qanunun aliliyi müasir hüquqi sistemlərdə" mövzusunda təşkil olunan beynəlxalq konfransın iştirakçılarına müraciət ünvanlayıb. Bu konfrans Azərbaycan Respublikası Konstitusiyasının qəbul edilməsinin 30-cu ildönümünə həsr olunub. Düz 30 il əvvəl, 1995-ci il noyabrın 12-də, Azərbaycan xalqı referendum yolu ilə suveren Azərbaycan Respublikasının ilk Konstitusiyasını qəbul etmişdir. Bu ali hüquqi sənədin qəbulu ölkə tarixi üçün çox əhəmiyyətli ictimai-siyasi hadisə oldu.

Həmin dövrdə ölkə yeni müstəqillik qazanmışdı, ərazilər hərbi təcavüzə məruz qalmışdı və daxili gərginlik hökm sürürdü. Buna baxmayaraq, Konstitusiyanın qəbulu Azərbaycanın dövlət quruculuğunda yeni bir səhifə açdı. Layihəsi Azərbaycan xalqının Ümummilli Lideri Heydər Əliyevin birbaşa rəhbərlik etdiyi komissiya tərəfindən hazırlandı. Bu sənəd ümumbəşəri dəyərlərə və dünyanın qabaqcıl demokratik dövlətlərinin konstitusiya təcrübəsinə əsaslanırdı. Konstitusiya müasir, demokratik, hüquqi və dünyəvi dövlət quruculuğunun, vətəndaş cəmiyyətinin bərqərar olmasının və demokratik ənənələrin təşəkkülünün qarantı rolunu oynadı.

Əsas Qanun Azərbaycan xalqını dövlət hakimiyyətinin yeganə mənbəyi elan etdi. O, hakimiyyətlərin bölgüsü prinsipinə uyğun olaraq, qanunvericilik, icra və məhkəmə hakimiyyətləri arasında qarşılıqlı balans və səlahiyyət çərçivəsini müəyyənləşdirdi. Dövlətin ali məqsədi kimi insan və vətəndaş hüquqlarının və azadlıqlarının, həmçinin vətəndaşlara layiqli həyat səviyyəsinin təmin edilməsi təsbit edildi. Konstitusiyada məhkəmə hakimiyyətinin müstəqilliyinin təmini, siyasi plüralizmin dəstəklənməsi və yerli özünüidarəetmənin fundamental əsaslarının formalaşdırılması da yer tutan əsas məsələlərdəndir. Qəbulundan keçən dövr ərzində Konstitusiya ölkə daxilində aparılan çoxşaxəli islahatlar və qloballaşan dünyaya inteqrasiya üçün özül kimi çıxış etdi. O, cəmiyyətdə qanunun aliliyinin təmin edilməsində, azad sahibkarlığın və bazar iqtisadiyyatının inkişafında, xalqın tarixi, milli-mədəni irsinin qorunması istiqamətində əvəzsiz rola malik olduğunu göstərdi.

Azərbaycanın sürətli sosial-iqtisadi inkişafı və regionun qabaqcıl dövləti kimi mövqeyi Konstitusiyanın da dövrün çağırışlarına uyğunlaşdırılmasını zəruri etdi. Bu məqsədlə müxtəlif illərdə Konstitusiyaya edilən əlavə və dəyişikliklər insan hüquq və azadlıqlarının təminatı mexanizmlərinin gücləndirilməsi, vətəndaş cəmiyyətinin əsaslarının dərinləşdirilməsi və dövlət idarəetməsinin təkmilləşdirilməsi yönündə çox əhəmiyyətli məsələləri ehtiva etmişdir. Bu il biz həm də işğala məruz qalmış torpaqlarımızın azad edilməsi uğrunda apardığımız 44 günlük Vətən müharibəsində qazandığımız tarixi Zəfərin beşinci ildönümünü böyük qürur hissi ilə qeyd edirik. Ölkənin ərazi bütövlüyünün və dövlətin suverenliyinin bərpası Azərbaycanın inkişafında yeni tarixi mərhələnin əsasını qoydu. Bu mərhələ iqtisadi, sosial və mədəni sahələrlə yanaşı, hüquqi sahədə də islahatlar aparılmasını tələb edir.

Prezident İlham Əliyev əmin olduğunu bildirib ki, konfransda konstitusiya quruculuğu sahəsində tanınmış mütəxəssislərin iştirakı ilə aparılacaq müzakirələr müxtəlif aktual mövzuları əhatə edəcək. Əldə olunacaq nəticələr Konstitusiyanın aliliyinin təmini, insan və vətəndaş hüquq və azadlıqlarının daha səmərəli müdafiəsi istiqamətində öz töhfəsini verəcəkdir. O, Bakıda konfrans iştirakçılarını ürəkdən salamlayaraq tədbirin işinə uğurlar arzulayıb.