İlham Əliyev ABŞ Mərkəzi Komandanlığının komandanını qəbul etdi

Azərbaycan Prezidenti İlham Əliyev oktyabrın 18-də ABŞ Mərkəzi Komandanlığının komandanı, Hərbi Dəniz Qüvvələrinin admiralı Bred Kuperi qəbul edib.

Qonaq Vaşinqtonda ABŞ Prezidentinin şahidliyi ilə Azərbaycanla Ermənistan arasında sülh gündəliyinin irəli aparılması üzrə əldə edilən nailiyyətlər münasibətilə Prezident Əliyevə təbriklərini çatdırdı. Dövlət başçısı təbriklərə görə minnətdarlığını bildirərək, bu məsələdə Prezident Donald Trampın xüsusi rolunu qeyd etdi. Prezident İlham Əliyev həmçinin Vaşinqtonda imzalanmış sənədlərin regionun inkişafı üçün geniş imkanlar yaratdığını vurğuladı. O qeyd etdi ki, Azərbaycanla Ermənistan artıq sülh şəraitində yaşamağa uyğunlaşıblar.

Söhbət zamanı son dövrlərdə Azərbaycan-ABŞ ikitərəfli münasibətlərinin inkişafı məmnuniyyətlə qeyd olundu. Tərəflər hərbi və hərbi-texniki sahələrdə gələcək əməkdaşlıq perspektivləri ilə bağlı fikir mübadiləsi apardılar. Bu görüş ikitərəfli əlaqələrin dərinləşməsi baxımından vacib əhəmiyyət daşıyır.