İki nəfərin ölümü ilə nəticələnən qəzanın VİDEOSU

Göygöldə ötən gecə baş verən ağır yol qəzasının təfərrüatları məlum oldu. Bu faciə iki nəfərin həyatına son qoydu, iki gənc isə ağır yaralandı. Məlumata görə, qəzaya səbəb olan hadisələr zənciri yaralı gənclərdən birinin atasının avtomobilini icazəsiz götürməsi ilə başlayıb.

O, idarə etmək üçün minik vasitəsini dostu, 27 yaşlı Elvin Məmmədova verib. Sürətlə idarə olunan bu avtomobil sonradan dörd gəncin taleyini dəyişən fəlakətə gətirib çıxardı. Qəzaya uğrayan avtomobil yaralılardan birinin atasına məxsus idi.

Kadrlardan göründüyü kimi, faciəyə səbəb yalnız sürücü Elvinin avtomobili həddindən artıq yüksək sürətlə sürməsi oldu. Maşında olan sərnişinlər sürücüdən dəfələrlə yavaş olmağı xahiş etsələr də, o, onların sözlərinə qulaq asmayıb. Hətta sərnişinlərdən biri ona xəbərdarlıq edərək: "Ay Elvin, nəsə olsa, tikəmizi də tapmayacaqlar. Yavaş sür!” deyə yalvarıb. Təəssüf ki, sürücü bu xəbərdarlıqlara məhəl qoymadı. Bu yüksək sürət avtomobilin nəzarətdən çıxmasına və dəhşətli qəzanın baş verməsinə səbəb oldu.

Qəza nəticəsində sürücü Elvin Məmmədov və avtomobildə olan 11-ci sinif şagirdi İsbi Alıyev həlak oldular. Hadisə zamanı digər iki gənc - 2008-ci il təvəllüdlü S. Əsgərov və 2009-cu il təvəllüdlü T. Süleymanov isə ciddi xəsarət aldılar. Yaralıların vəziyyəti ağırdır. Bu dəhşətli hadisə yol təhlükəsizliyi qaydalarına riayət etməyin nə qədər böyük əhəmiyyət daşıdığını bir daha göstərir.