Gürcüstan və Azərbaycan gömrük məntəqələrinin yaradılması üzərində işləyir

Gürcüstan və Azərbaycan "bir pəncərə" konsepsiyası əsasında birgə sərhəd-nəzarət buraxılış məntəqələri yaratmaq üzərində işləyir. Gürcüstanın maliyyə naziri Laşa Xutsişvili bu barədə Vaşinqtonda keçirilən görüşdə məlumat verib. Görüş Mərkəzi Asiya və Qafqaz ölkələrinin maliyyə nazirləri, mərkəzi bank rəhbərləri və Beynəlxalq Valyuta Fondunun (BVF) baş direktorunun müavini Bo Li arasında baş tutub. Nazir bildirdi ki, bu işlərin görülməsi prosedurların və infrastrukturun sadələşdirilməsini tələb edir.

O, həmçinin qeyd edib ki, son illərdə Gürcüstan hökuməti dövlət xidmətlərini sadələşdirmək, rəqəmsal vergitutma tətbiq etmək və effektiv gömrük nəzarətini həyata keçirmək üçün mühüm addımlar atıb. Regional əlaqələrin güclənməsi baxımından infrastrukturun tamamlanması xüsusi əhəmiyyət daşıyır. L. Xutsişvili vurğulayıb ki, Azərbaycan, Türkiyə və Ermənistan sərhədlərinə qədər avtomagistralın son hissələrinin tikintisinin başa çatdırılması vacibdir. Bu işlər ölkələr arasındakı əlaqələri daha da sıxlaşdıracaq.

Nazir çıxışında Orta Dəhlizin strateji əhəmiyyətindən və Gürcüstanın bu layihəyə yönəltdiyi sərmayələrdən də danışıb. Orta Dəhlizin səmərəli və stabil marşrut kimi fəaliyyət göstərməsi üçün bəzi şərtlər tələb olunur. Bu dəhliz digər marşrutlara qismən alternativə çevrilə bilər. Bunun baş verməsi üçün Cənubi Qafqaz və Mərkəzi Asiya ölkələri arasında daha sıx əməkdaşlıq şərt sayılır. Bundan əlavə, beynəlxalq maliyyə institutlarının davamlı dəstəyi də zəruridir.