Festival Azərbaycanın dini və mədəni zənginliyini nümayiş etdirəcək -Gündüz İsmayılov

Bakı Ekspo Mərkəzində təşkil olunacaq “Fərqliliyin rəngi” festivalı Azərbaycanın dini-mədəni müxtəlifliyini, konfessiyalararası həmrəyliyi və milli birliyi nümayiş etdirməyi hədəfləyir. Azərbaycan Respublikasının Dini Qurumlarla İş üzrə Dövlət Komitəsinin sədr müavini Gündüz İsmayılov jurnalistlərə bu barədə məlumat verib.

O qeyd edib ki, festivalın əsas məqsədi ölkəmizin zəngin dini irsini, eləcə də fərqli konfessiyaların qarşılıqlı anlaşma və dostluq mühitində necə fəaliyyət göstərdiyini ictimaiyyətə təqdim etməkdir. Gündüz İsmayılovun sözlərinə görə, tədbir çərçivəsində dini icmaların tarixi, dəyərləri və fəaliyyət istiqamətləri barədə məlumat verən eksponatlar sərgilənəcək. Burada fotostendlər, ədəbiyyat nümunələri, milli geyimlər və əl işləri iştirakçılara təqdim ediləcək. Festival həm də dini məzmunlu fərqli eksponatları bir araya gətirərək, Azərbaycan cəmiyyətinin konfessiyalararası əlaqələrini əyani şəkildə göstərməyi planlaşdırır.

Festivalda iştirakçılar bir çox fərqli dini icmanın stendləri ilə tanış olacaqlar. Bu icmalar arasında Qafqaz Müsəlmanları İdarəsi, Rus Pravoslav Kilsəsi, Roma Katolik Kilsəsi yer alır. Həmçinin, Dağ, Sefarad və Avropa yəhudiləri kimi fərqli yəhudi icmaları da təmsil olunacaq. Digər iştirakçılar Azərbaycan Bibliya Cəmiyyəti, Bəhailər Dini Mərkəzi, Alban-Udi, Krişna Şüuru, Gürcü pravoslav və Molokan-ruhani xristian icmalarıdır. Bu geniş spektr Azərbaycanın milli birliyini və tolerantlığını təsdiqləyir.