Deputat qalmaqallı qurultayla bağlı məlumat yaydı

Ana Vətən Partiyasının sədr müavini, deputat Günay Ağamalı partiyanın növbədənkənar IX qurultayında yaşanan gərginliklərlə bağlı rəsmi bəyanat yayıb. O, mediaya müraciət edərək qurultay haqqında yayılan dezinformasiyalara inanmamağı xahiş edib. Günay Ağamalı bildirib ki, partiya sədri Fazail Ağamalı iclası qeyri-müəyyən müddətə təxirə salmaq məcburiyyətində qalıb.

Bu qərar qarşı tərəfdən qaynaqlanan, əvvəlcədən hazırlanmış qeyri-etik, qalmaqal və təhdid xarakterli davranışlar səbəbindən verilib. Həmin hərəkətlər qurultayın gedişinə mane olurdu. Sosial media üzərindən əks tərəf özlərinin partiya sədri seçilməsi barədə yalan məlumatlar yayır. Günay Ağamalı qeyd edir ki, bütün bu məlumatlar əsassızdır.

Qurultayın aparılması üçün seçilən sədr Fazail Ağamalı və Nuranə Axundova fasilə elan edildikdən sonra zalı tərk etdilər. Fazail Ağamalı açılış çıxışında sədrlikdən istefa vermək istəyini bildirmişdi, lakin bu məsələ rəsmi olaraq həllini tapmadı. Deputat vurğulayıb ki, qeyd edilən faktlar qurultay iştirakçılarına hörmətsizlik, prosesin pozulması və sədrliyə namizədliyi irəli sürülən digər üç nəfərin hüquqlarının kobud şəkildə pozulmasıdır.

Bütün bu maneələrə baxmayaraq, partiya təməl prinsipləri və ənənəvi siyasi xətti üzrə öz fəaliyyətini yüksək səviyyədə davam etdirəcəkdir. Partiyanın mövqeyi budur ki, səs-küylü hərəkətlər prosesi dayandırmağa nail olmayacaq və Ana Vətən Partiyası öz yolunu davam etdirəcək.