DÇ-2026: Günün futbol qrafiki

Bu gün, 16 noyabr tarixində 2026-cı il Dünya Çempionatının (DÇ-2026) Avropa zonası üzrə seçmə mərhələsində növbəti oyunlar keçiriləcək. Futbol azarkeşləri 8 maraqlı qarşılaşmaya şahidlik edəcəklər. Günün əsas diqqət mərkəzində olan matçlardan biri D qrupunda baş tutacaq. Burada Azərbaycan millisi güclü Fransa komandasını qəbul edəcək. Bütün oyunların qrafiki və qruplardakı mövcud xal durumu açıqlanıb.

D qrupunda Azərbaycan və Fransa arasındakı görüş Bakı vaxtı ilə 21:00-da başlayacaq. Eyni saatda Ukrayna İslandiya ilə mübarizə aparacaq. Hazırda bu qrupda Fransa 13 xalla liderdir. İslandiya və Ukraynanın hər biri 7 xalı var. Azərbaycan isə cəmi 1 xalla qrup cədvəlinin sonuncusudur.

F qrupunda da mühüm qarşılaşmalar oynanılacaq. 18:00-da Macarıstan İrlandiya, Portuqaliya isə Ermənistan ilə qarşılaşacaq. F qrupunun lideri Portuqaliyanın 10 xalı var. Macarıstan 8 xal, İrlandiya 7 xal toplayıb, Ermənistan isə 3 xalla dördüncüdür.

Gecə seansında I və K qruplarının oyunları nəzərdə tutulub. I qrupunda 23:45-də İtaliya - Norveç və İsrail - Moldova oyunları başlayacaq. Bu qrupda 7 oyuna 21 xal toplayan Norveç birinci, İtaliya isə 7 oyuna 18 xalla ikinci yerdədir. K qrupunda 21:00-da Albaniya İngiltərə ilə, Serbiya isə Latviya ilə oynayacaq. İngiltərə 7 oyuna 21 xalla mütləq liderdir. Albaniya 14 xalla ikinci, Serbiya 10 xalla üçüncü yerdədir.