"Burnunu tutsan, canı çıxar" - Əli İnsanov

Haqq və Ədalət Partiyasının sədri, eks-səhiyyə naziri Əli İnsanov TV Müsavata müsahibəsində Prezident Administrasiyasının eks-rəhbəri Ramiz Mehdiyevin həbsi ilə bağlı danışarkən çox sərt fikirlər səsləndirib. İnsanov bildirib ki, Mehdiyevin əsl gücü şəxsi xarakterində yox, yalnız tutduğu vəzifədə və ona verilən hüdudsuz səlahiyyətlərdə olub. Keçmiş nazir onun işsiz olduğu vaxtları yaxşı xatırladığını deyir. Həmin dövrdə Mehdiyev olduqca küncə sıxışdırılmışdı. O, cəmiyyətdən tamamilə təcrid olunmuşdu. İnsanovun iddiasına görə, Xalq Hərəkatının güclü dövrlərində Mehdiyev heç kimə lazım olmayan və heç bir əhəmiyyəti olmayan bir adam idi.

Əli İnsanov Ramiz Mehdiyevin həbsxana şəraitinə qətiyyən dözməyəcəyini düşünür. Keçmiş nazir onun iradəsinin zəif olduğunu iddia edir. "Həbsxanaya düşsə, tezliklə ölə bilər. Dözməz o şəraitə," deyə İnsanov qeyd edib. O, Mehdiyevin fiziki və mənəvi cəhətdən nə qədər kövrək olduğunu göstərmək üçün sərt bir metafora işlədib: "Onun burnunu tutsan, canı çıxar, dözməz orada." İnsanov bu səbəbdən Mehdiyevin həbsxanaya yerləşdirilməyəcəyini güman edir. Əks halda, Mehdiyev orada bir həftəyə ölər. Əgər belə bir hal baş versə, Mehdiyev öləcək və işlər yarımçıq qalacaq. "Onda kimdən soruşacaqlar, niyə belə etmisən?", İnsanov sual edib.

Keçmiş nazir, Mehdiyevin həyatı boyu idarə olunan bir şəxs olduğunu, heç vaxt heç kimi idarə etmədiyini söyləyib. O cür adamların sadəcə meydana gəldiyini vurğulayıb. İnsanov, Ramiz Mehdiyevin yenidən hakimiyyətə gəlməsi məsələsinə də toxunub. O iddia edir ki, Rusiya Mehdiyevin yenidən hakimiyyətə gəlməsi üçün təkid və təklif edib. Müdrik Heydər Əliyev isə bir balaca Ramiz Mehdiyevə görə Rusiya ilə mübahisəyə girişməyi lazım bilməyib. Sonralar Mehdiyev bir müddət unudulsa da, ayrı-ayrılıqda hər bir şəxsə məlumatlar gəlirdi. Bu məlumatlara görə Mehdiyev Rusiyanın dediklərini olduğu kimi yerinə yetirirdi. Keçmiş nazir, Mehdiyevin Azərbaycanın görkəmli siyasətçilərini və insanlarını rusiyapərəst etmək üçün iş apardığını və buna müəyyən qədər nail olduğunu deyərək sözlərini tamamlayıb.