Bu ölkə maska rejiminə qayıdır

Böyük Britaniyada qripə yoluxanların sayında kəskin artım müşahidə edildiyi üçün ölkə Səhiyyə Təhlükəsizliyi Agentliyi (UKHSA) vətəndaşları maska taxmağa çağırıb. UKHSA vəziyyətin kəskin xarakter alacağından ehtiyatlanaraq, bu addımın zəruri olduğunu bildirir. Agentlik maska istifadəsini sadəcə ehtiyat tədbiri adlandırır.

Mütəxəssislər maska taxmağın, həmçinin gigiyena qaydalarına ciddi əməl etməyin böyük əhəmiyyətə malik olduğunu vurğulayıblar. Rəsmilər bu il qripə yoluxma hallarının xeyli artmasını qeyri-adi bir vəziyyət kimi qiymətləndirirlər. Onların fikrincə, virusun mutasiyaya uğraması səbəbindən qrip mövsümü adət olunandan bir ay erkən başlayıb. Dünya Qrip Mərkəzinin direktoru, professor Nikola Luis yaranmış vəziyyətlə bağlı şərh verib. O deyib: “Bir müddətdir ki, belə bir virus görmədik, dinamika qeyri-adidir. Mən narahatam, amma panikaya düşmürəm.”

UKHSA qrip kimi ümumi infeksiyaların yayılmasının qarşısını almaq üçün bir sıra sadə tədbirlərin görülməsini tövsiyə edir. Bu tövsiyələr kollektiv sağlamlığı qorumağa yönəlib. Agentlik aşağıdakı addımları atmağı təklif edir: Daimi olaraq əlləri yumaq; qapalı məkanlarda pəncərələrin açılması ilə havalandırmanı artırmaq; öskürək və asqırıqları idarə etmək üçün salfetlərdən istifadə etmək. Özünü pis hiss edən şəxslərin evdə qalması vacibdir. Həmçinin, çölə çıxarkən maska taxmaq da əsas məsləhətlərdəndir.