Bakıda tibb bacısı vətəndaşın evini qarət etdi

Bakıda tibb bacısı xidmət göstərdiyi vətəndaşın evini qarət edib. Bu hadisə Sabunçu rayonu Sabunçu qəsəbəsinin Q. Vəzirov küçəsində qeydə alınıb. Yaşadığı məhəllədə tibb bacısı kimi çalışan 36 yaşlı Nərmin Mustafayeva (ad və soyad şərtidir) inamdan sui-istifadə edib. O, pasiyentə tibbi yardım göstərərkən zərərçəkənin qızılları harada gizlətdiyini görüb. Bakıda tibb bacısı olan bir şəxsin xəstəsinin evindən oğurluq etməsi hadisəsi ətrafda böyük narahatlığa səbəb oldu.

Nərmin hadisənin təfərrüatlarını danışıb. O bildirib ki, Pərvanə cərrahi əməliyyat olunduğu üçün ona sistem qoşurdu. Bir dəfə Pərvanənin iki boyunbağını şalvarının cibinə qoyaraq şkafda gizlətdiyini görüb. Növbəti dəfə sistem qoşmağa gedəndə Pərvanənin evinin qapısı açıq olub. Nərmin onu səsləyib, amma evdən qızı çıxıb. Qız anasını qonşudan çağırmağa gedən zaman, Nərmin otağa girərək həmin qızılları götürüb. O, səhəri gün zinət əşyalarını lombardda 750 manata satıb. Oğurlanan təxminən 10 qrama yaxın qızılın ümumi dəyəri 1200 manat təşkil edib. Pərvanə zəng edib oğurluqla bağlı sual verəndə, Nərmin pulu qaytaracağını desə də, dəyən ziyanı tam ödəyə bilməyib.

Əməlindən peşman olduğunu deyən Nərmin, himayəsində azyaşlı övladı olmasının nəzərə alınmasını xahiş edib. Buna baxmayaraq, onun barəsində Cinayət Məcəlləsinin 177.2.3-cü (evə qanunsuz daxil olmaqla oğurluq etmək) maddəsi ilə cinayət işi başlanıb. Məsələ Sabunçu rayon Məhkəməsində araşdırılıb. Hakim Teymur Həsənovun sədrliyi ilə keçirilən prosesdə Nərmin Mustafayevanın cəzası müəyyən edildi. Məhkəmənin qərarı ilə Nərmin Mustafayeva barəsində 2 il müddətinə azadlığın məhdudlaşdırılması cəzası verilib.