Bakıda avtoxuliqanlıq edən sürücü həbs edildi

Bakıda avtoxuliqanlıq hərəkətləri edərək bunun videosunu "TikTok"da paylaşan sürücü saxlanılıb və barəsində həbs qərarı çıxarılıb. Daxili İşlər Nazirliyinin yaydığı məlumata görə, hadisə paytaxtın Nizami rayonu ərazisində baş verib. Avtoxuliqanlıq edən nəqliyyat vasitəsinin sürücüsü Tural İbrahimov saxlanılıb. O, sürücülük hüququ olmadan ictimai asayişi nümayişkaranə şəkildə pozmuş, eyni zamanda digər hərəkət iştirakçılarına ciddi təhlükə yaratmışdı. İbrahimov "Tofaş" markalı, 10-ST-665 dövlət qeydiyyat nişanlı avtomobili idarə edirdi.

Tural İbrahimov idarə etdiyi avtomobillə intizamsızlıq göstərərək yol hərəkəti qaydalarını kobud şəkildə pozub. Onun yol verdiyi bu xuliqanlıq hərəkətləri intizamın olmaması ilə yanaşı, qanuna qarşı açıq hörmətsizlik idi. O, həm də öz qanun pozuntularını sənədləşdirərək görüntüləri "TikTok" sosial şəbəkəsində paylaşıb.

Sürücü barəsində inzibati qaydada protokol tərtib edilib. Sənədlər baxılması üçün aidiyyəti üzrə rayon məhkəməsinə göndərildi. Məhkəmənin qərarı ilə Tural İbrahimov inzibati qaydada 20 sutka həbs edilib. Bundan əlavə, məhkəmə onun sürücülük hüququnu bir il müddətində məhdudlaşdırıb.