Bakıda 10 ailənin həyatı təhlükə altındadır -SƏBƏB

Bakının Suraxanı rayonu, Qaraçurux qəsəbəsində yaşayan 10 ailə böyük təhlükə ilə üz-üzədir. Son aylarda yağan intensiv yağışlar ərazidə torpaq sürüşməsini aktivləşdirib, nəticədə yaşayış binaları ciddi ziyan görüb. Sakinlər bildirirlər ki, bu təhlükə getdikcə artır və evlər hər an uça bilər.

Yeni Günəşli yaylası küçəsində yerləşən bu evlərdə artıq iri çatlar əmələ gəlib, hasarlar isə tamamilə uçub. Bəzi ikimərtəbəli evlər uçma riski altındadır. Sakinlər deyirlər ki, son bir ildə yağışlar sürüşməni şiddətləndirib və bu, yerli sakinlər üçün gündəlik həyatı təhlükəli edir.

Qəsəbə sakinləri təhlükə səbəbilə Fövqəladə Hallar Nazirliyinə (FHN) dəfələrlə müraciət ediblər. Nazirliyin əməkdaşları əraziyə gələrək yerində baxış keçiriblər. Aparılan təhlildən sonra FHN rəsmiləri evlərin boşaldılması barədə rəy veriblər. Bu rəy, ərazinin yaşayış üçün yararsız olduğunu göstərir.

Hazırda 10 ailə dövlət qurumlarından kompensasiya gözləyir. Sakinlərin sözlərinə görə, uçma təhlükəsi olan evlərdən birinin sahibinə Suraxanı Rayon İcra Hakimiyyəti tərəfindən kompensasiya ödənilib və həmin ailə ərazini tərk edə bilib. Qaraçurux qəsəbəsində təhlükə ilə üz-üzə qalan digər 10 ailə də təhlükəli zonadan təxliyə edilmək və müvafiq kompensasiya almaq istəyir.