“Azercell” bu tarifi 2 manat bahalaşdırır

"Azercell Telekom" MMC iki populyar internet paketində qiymət dəyişikliyi edir. Şirkət “GigaMax” və “GigaMax+” paketləri üzrə tarifləri 2 manat artırmağa qərar verib. Bu qərar dekabrın 1-dən qüvvəyə minəcək. Yeni qiymətlərə görə, "GigaMax" paketi 16,9 manatdan 18,9 manata, "GigaMax+" paketi isə 26,9 manatdan 28,9 manata qalxacaq.

Bu qiymət artımı abunəçilər üçün vacib bir müsbət dəyişikliklə müşayiət olunur. Belə ki, paketlər üzrə indiyə qədər mövcud olan 1 mb/s və 7 mb/s maksimal sürət limitləri aradan qaldırılır. Tariflər bahalaşsa da, paketlərin təklif etdiyi internet həcmi olduğu kimi qalır. Abunəçilər “GigaMax” üçün 60 GB və “GigaMax+” üçün 80 GB internet həcmindən istifadə etməyə davam edəcəklər.

Azercell dekabrın 1-dən etibarən bu iki paketin satışını məhdudlaşdırır. Həmin tarixdən başlayaraq, "GigaMax" və “GigaMax+” internet paketlərinə yeni qoşulmalar dayandırılır. Bu qərar, eyni zamanda, mövcud abunəçilərin xidmətlərdən istifadəsini tənzimləyir. Göstərilən tarixə qədər bu paketləri aktivləşdirən istifadəçilər mövcud abunəliklərini ləğv etməyənə qədər xidmətlərdən istifadəni davam etdirə biləcəklər. Onlar yenilənmiş qiymətlər və sürət şərtləri ilə xidmətlərdən istifadəni davam etdirəcəklər.