Azərbaycanın əməkdar artisti vəfat etdi -FOTO

İtaliyanın məşhur azərbaycanlı xoreoqrafı, Azərbaycanın Əməkdar artisti Mais Nuriyev vəfat edib. O, uzun illər ərzində İtaliyada fəaliyyət göstərən "Azəri" Azərbaycan Mədəniyyət Assosiasiyasının sədri vəzifəsini icra edirdi. Bu kədərli xəbər Diasporla İş üzrə Dövlət Komitəsindən bildirilib.

Mais Nuriyev təkcə mədəniyyət xadimi deyil, həm də tanınmış pedaqoq idi. O, Milandakı "Aida" və "Orizon" Rəqs Akademiyasının və Milan Konservatoriyasının professoru olub. Xoreoqraf peşəkar fəaliyyəti boyunca Azərbaycan xalq rəqslərini dünya səhnələrinə daşıyıb. O, zəngin mədəni irsimizi, tariximizi və milli dəyərlərimizi İtaliyada və başqa ölkələrdə layiqincə tanıdıb, mədəni diplomatiyaya böyük töhfələr verib.

Soydaşımız Diasporla İş üzrə Dövlət Komitəsi ilə sıx əməkdaşlıq edərək İtaliyada yaşayan azərbaycanlıların bir araya gəlməsi üçün çalışırdı. O, Azərbaycan mədəniyyətinin Avropada təbliği istiqamətində vacib işlər görüb. Onun yorulmaz tədris fəaliyyəti sayəsində çoxlu gənc xoreoqraf yetişib. Bu şəxslər ölkəmizin mədəniyyətini beynəlxalq aləmdə daha geniş auditoriyaya çatdırıblar. Mais Nuriyev öz fəaliyyəti ilə İtaliya ictimaiyyəti arasında böyük nüfuza malik idi, iki ölkə arasında dostluq əlaqələrini gücləndirib, ölkəmizə yeni dostlar qazandırıb.

Mais Nuriyev göstərdiyi xidmətlərə görə Azərbaycan Respublikasının Prezidenti İlham Əliyevin Sərəncamı ilə Əməkdar artist fəxri adı alıb. O, həmçinin yüksək dövlət mükafatları ilə təltif olunub. Bunlara "Heydər Əliyevin 100 illiyi (1923-2023)" yubiley medalı və "Diaspor fəaliyyətində xidmətə görə" medalı daxildir.