Azərbaycandakı siyasi partiyalar birgə bəyanat yaydı

Azərbaycanda fəaliyyət göstərən siyasi partiyalar Zəfər Gününün beşinci ildönümü ilə əlaqədar birgə bəyanat yayıblar. Bu bəyanatda 2020-ci il sentyabrın 27-də başlayan Vətən müharibəsi xatırlanır. Həmin müharibə Azərbaycan xalqının böyüklüyünü, əzmini və qəhrəmanlığını bütün dünyaya göstərdi. Uzun illər düşmən işğalında qalan Qarabağ və Şərqi Zəngəzur əraziləri 44 gün davam edən Vətən müharibəsi Zəfəri ilə öz azadlığına qovuşdu. Azərbaycan Ordusunun cəsur döyüşçüləri öz arxalarında Azərbaycan xalqının tükənməz gücünü və birliyini hiss edərək Ermənistan ordusunu darmadağın etdi. Bununla da Qafqazda uzun illər mövcud olan erməni mifi tarixin zülmətinə göndərildi.

Vətən müharibəsində Azərbaycan xalqının və Ordusunun qazandığı Qələbə dövlətçilik tarixinə qızıl hərflərlə həkk olunaraq ölkənin növbəti nailiyyətlərinin açarına çevrildi. Müharibədən sonra Azərbaycan dövləti sülhpərvər və tolerant mövqe sərgiləsə də, Qarabağda qalan erməni separatçıları azad edilmiş ərazilərimizdə quruculuq işləri ilə məşğul olan vətəndaşlara qarşı cinayətlər törətməyə davam etdilər. Bundan başqa, Ermənistan kapitulyasiya aktında üzərinə götürdüyü öhdəlikləri yerinə yetirmədi. Azərbaycanın ərazi bütövlüyünə yönəlik təhdidlərin davam etməsi 2023-cü il sentyabrın 19-da başlayan birgünlük antiterror əməliyyatlarını zəruri etdi. Xalq-ordu birliyinin nəticəsi olan bu əməliyyat qalibiyyətlə başa çatdı. Azərbaycanda yer almış separatçı qüvvələrin kökü birdəfəlik kəsildi. Azərbaycan dövlətinin ərazisindən könüllü şəkildə çıxan ermənilər tarixdə azərbaycanlılara qarşı törətdikləri qanlı cinayətlərin hüquqi müstəvidə cəzasından qorxdular. Azərbaycan Ordusunun şərəflə icra etdiyi bu tarixi missiya ölkəmizə tarixində ilk dəfə tam suverenlik qazandırdı.

Azərbaycan indi öz tarixinin ən güclü, şərəfli və məğrur dövrünü yaşamaqdadır. 44 günlük Vətən müharibəsinin nəticəsində təkcə ərazi bütövlüyümüz bərpa edilmədi, eyni zamanda Azərbaycan xalqının qüruru özünə qayıtdı və Azərbaycan dünya dövlətləri sırasında qalib dövlətə çevrildi. Dünya tarixinin ən qarışıq zamanında Azərbaycan xalqının, Ordusunun və Prezident, Müzəffər Ali Baş Komandan İlham Əliyevin dövlətçilik tariximizə bəxş etdiyi bu şanlı səhifə daim xatırlanacaq. Bu gün Azərbaycan beynəlxalq miqyasda söz sahibidir. İşğaldan azad edilmiş Qarabağ və Şərqi Zəngəzurda misli görünməmiş sürətlə bərpa-quruculuq işləri həyata keçirilir. Bu, əzəli torpaqlarımıza həyat bəxş edir və bütün dünyaya Azərbaycanın gücünü nümayiş etdirir. Erməni vandalizminin qurbanı olan tarixi abidələrimiz bərpa olunur, şəhərlər yenidən qurulur. Şuşa, Xankəndi, Laçın və digər şəhərlər dünyanın nüfuzlu liderlərinin görüş məkanına çevrilir.

Qarabağda aparılan quruculuq prosesi dost ölkələrin də yüksək diqqət mərkəzindədir. Xüsusən Türk Dövlətlərinin rəhbərlərinin Qarabağda və Şərqi Zəngəzurda aparılan quruculuq işlərinə dəstəyi türk birliyinin simvoluna çevrilir. Qısa zamanda fəaliyyətə başlayacaq Zəngəzur dəhlizi layihəsi təkcə Azərbaycanın ərazilərini deyil, bütün türk dünyasını bir-biri ilə bağlayacaq. Bu dəhliz Uzaq Şərqi Avropa ilə birləşdirən tarixi İpək Yolunun bir parçasına çevrilir. Partiyalar dövlətin dünya birliyində tutduğu layiqli mövqeyi və Qalib dövlət nüfuzunun qorunması istiqamətində atılan addımları yüksək qiymətləndirirlər. Vətən naminə daim siyasi milli birliyi dəstəkləyən partiyalar xalqımızı və dünya azərbaycanlılarını Zəfər Gününün beşinci ildönümü münasibətilə təbrik edir, hər kəsi güclü Azərbaycan naminə sarsılmaz milli birliyə səsləyirlər.

Bəyanatı imzalayan partiyalar:

1. Yeni Azərbaycan Partiyası

2. Vətəndaş Həmrəyliyi Partiyası - Sabir Rüstəmxanlı

3. "Ana Vətən" Partiyası - Fəzail Ağamalı

4. Ədalət, Hüquq, Demokratiya Partiyası - Qüdrət Həsənquliyev

5. Böyük Quruluş Partiyası - Fazil Mustafa

6. Demokratik İslahatlar Partiyası - Asim Mollazadə

7. Azərbaycan Demokratik Maarifçilik Partiyası - Elşən Musayev

8. Milli Cəbhə Partiyası - Razi Nurullayev

9. "Azərbaycan Milli İstiqlal" Partiyası - Arzuxan Əlizadə

10. "Böyük Azərbaycan" Partiyası - Elşad Musayev

11. Haqq Ədalət Partiyası - Əli İnsanov