Argentinanın tanınmış futbolçusu Türkiyə millisində oynaya bilər

Türkiyə milli komandası Argentinanın aşağı yaş qruplarında oynayan Can Armando Güneri heyətinə cəlb etmək üçün ciddi fəaliyyətə başlayıb. Türkiyə Futbol Federasiyası rəsmiləri hazırda Almaniyanın Bundesliqa təmsilçisi olan "M'Gladbach" klubunda çıxış edən bu istedadlı oyunçunun öz millilərini seçməsini istəyir.

Məlumatlara görə, Can Armando Günerin ailə mənşəyi qarışıqdır. Onun anası alman, atası türkdür, nənəsi isə argentinalıdır. Bu vəziyyət ona müxtəlif ölkələrin milli komandaları arasında seçim etmək imkanı verir. Gənc futbolçu milli komanda seçimi ilə bağlı əvvəlki qərarlarında dəyişiklik edib. O, əvvəlcə Almaniya milli komandasının dəvətini qəbul etmişdi, lakin daha sonra fikrini dəyişərək Argentinanın aşağı yaş qruplarında oynamaq təklifini qəbul etdi. Can Armando Güner bu seçim sayəsində Argentinanın U17 komandası ilə Qətərdə keçiriləcək U17 Dünya Kubokunda iştirak etmək şansı qazanıb.

Türkiyə rəsmiləri oyunçunun Argentinanı seçməsinə baxmayaraq, onun üçün rəsmi dəvət göndərməkdən çəkinməyiblər. Onlar hücumçunun gələcəkdə əsas milli komandada Türkiyə formasını geyinməsini arzulayırlar. Bu dəvət Can Armando Günerin qarşısında duran çətin bir qərarı göstərir. O, hələ də əsas milli komanda seçimi barədə qəti qərarını verməyib və hansı ölkəni təmsil edəcəyi hələ ki, sual altındadır.